5 sikop sa kadlawon nga ronda, buy-bust

CEBU, Philippines - Nasikop ang duha ka tawo ug kapin sa P150 mil nga kantidad sa shabu ang nasakmit sa mga sakop sa City Intelligence Branch (CIB) sa Cebu City Police Office sa duha ka sunod-sunod nga pagpangronda sa nakalabay nga kadlawon.

Ala 1:15 sa kadlawon unang nadakpan si Sandro Navarro, 20, ulitawo, sa Sitio Mahayahay, Calamba.

Ang pagpangronda gipangulohan ni Chief Insp. Christopher Navida, hepe sa maong buhatan.

Gamit ang P200 ilang nasignit si Navarro human kini nakatunol og usa ka pakete sa gituhoang shabu.

Narekober sa mga polis sa dinakpan ang 10 gramos nga shabu nga kantidad og P118, 000 ug usa ka .38 revolver nga dunay tulo ka bala.

Pasado alas 2 sa kadlawon sunod nga nadakpan si Jose Fuentes, 29, ulitawo nga taga Sitio Pansang, Inayawan.

Nakuha sa mga polis gikan sa suspek ang lima ka gramos sa gituohang shabu nga kantidad og P59, 000.

Samtang nagkantidad og P3,776 nga shabu ang nasakmit sab gikan sa tulo ka suspetsadong tigpahuyot og ilegal nga druga atol sa buy-bust operation niadtong Martes pasado alas 2:50 sa buntag sa Buaya, Dakbayan sa Lapu-Lapu.

Ang mga suspek naila nga sila si Ronie Silawan Narito alyas Takal, 29; Christian Limana Cuizon alyas Chanman, 18, ug Alden Ybañez Linao alyas Opao, 21, taga Saac 1 sa maong lugar.

Si Narito gikonsiderar nga level 2 drug pusher.

Gipahigayon ang operasyon sa kapolisan uban ang Philippine Drug Enforcement Agency-7.

Nakuha sa operasyon ang siyam ka paketeng gidudahang shabu, ug duha ka P100 buy-bust money.

Kasamtangang nagtingkagol ang mga suspek sa Lapu-Lapu City Police Office holding cell ug gikatakdang pasakaan sa tukmang kaso. (BANAT NEWS)