Black belter nanunggab og polis

CEBU, Philippines - Unom ka tahi sa nawong ang naangkon sa usa ka polis human kini gidunggab sa iyang gidakop nga drug suspect sa Kamagayan, Dakbayan sa Sugbo pasado alas 7 sa nakalabay nga gabii.

Nalandig sa pribadong tambalanan si Police Officer 3 Nelson Lagumbay human gihiwa sa usa ka Mark Solon, 23, nga taga Mabolo, ang iyang nawong.

Matud ni Police Officer 2 Edadis Bustarde sa Parian Police Station nga samtang naghimo sa pagpatrolya si Lagumbay ug kaubanan ilang nasigpatan si Solon nga kadudahan ang lihok.

Dihang gisita sa mga polis, iyang giitsa sa atubangan sa mga polis ang pinaketeng shabu dungan ang pagpangdunggab gamit ang cutter knife.

Suway pa unta nga nidagan si Solon apan kini napusilan sa iyang tiil hangtud nga nadakpan human sa ginukdanay.

Nagduda si Bustarde nga lagmit liog ang target ni Solon sa pagdunggab apan gumikan kay nakalikay ang polis ug didto kini naigo sa nawong.

“Panabla siguro to’ng iyaha, murag liog gyud target niya, swerte pa siya kay tiil ra niya ang napusilan,” matud ni Bustarde.

Si Solon ang kanhi nadakpan na sab sulod sa korte sa Qimonda Building niadtong Pebrero human kini nakita nga nagdala og armas.

Naila sab si Solon nga kamao sa karate isip black belter sa martial arts.

Duha ka medium-size sa gituohang shabu sa wala matino nga kantidad ang nakuha ingon ang kutsilyo nga iyang gigamit.

Ang dinakpan nipasangil nga planted ang shabu nga nakuha gikan kaniya.

Si Senior Superintendent Joel Doria, director sa Cebu City Police Office, nitug-an nga lehitimo ang operasyon ug walay tumong nga patyon ang dinakpan.

Matud ni Doria nga maisogon ang iyang mga sakop sanglit bisan ngitngit ang lugar sa Kamagayan apan padayon gihapon kining nagpatrolya.

Ang polis ug ang suspek parehong nakagawas na sa tambalanan.

Kasong paghupot og drugas, frustrated homicide ug direct assault ang ipasaka sa kapolisan batok sa suspek kinsa gibalhug sa selda sa Parian Police Station. (BANAT NEWS)