Manaygon sa jeep ipabadlong
CEBU, Philippines - Samtang nagkaduol ang kasaulogan sa Pasko ug Bag-ong Tuig nauso na sab kining mga manaygunay sulod sa mga jeep de pasaheroan nga gilangkuban sa grupo sa mga kabatan-onan.
Nakadapit kini sa pagtagad ni Konsehal Dave Tumulak kinsa maoy Chairman sa Committee on Public Safety and Order hinungdan nga iyaha dayon nga gitawag ang atensiyon sa kapulisan aron mabadlong kini.
Sa Facebook account ni Konsehal Tumulak iyahang gi-post ang hulagway sa grupo sa mga kabatan-onan nga nanaygon sa mga jeep de pasaheroan.
Dugang sa konsehal nga kining uban di manganaog hangtud dili mahatagan, samtang ang uban mamugos ug magsige og panguhit sa mga pasahero. Gihangyo ni Tumulak ang pasahero nga dili gyud mohatag sa maong mga tawo ug gimanduan na usab niini ang Cebu City Police Office nga badlungon kini tungod kay matawag kini nga extortion ug may ordinansa batok niini. (BANAT NEWS)
- Latest