Opisyales sa Apas ug CentCom magtinabangay
CEBU, Philippines - Mas palig-onon pa sa Barangay Apas ang ilang pakiglambigit sa Armed Forces of the Philippines Central Command tungod ug alang sa mga konstituwente sa maong lugar.
Ang maong kalambuan matuman unya human ang duha ka partido nga gipangulohan nilang Kapitan Ramil Ayuman ug CentCom commander Lieutenant General Raul Del Rosario nagkasabot nga magpinirmahay og Memorandum of Agreement aron magtinabangay pinaagi sa paghatag og basic services alang sa mga residente sa Apas.
"WHEREAS, in the interest of public service, the desire of both parties to continue and strengthen this cooperation, collaboration, and coordination for the development and welfare of the people of Barangay Apas," tipik sa MOA.
Matud ni Kapitan Ayuman nga kabahin sa maong kasabutan, ang CentCom mo-deploy og personahe ug ubanan ang operasyon sa mga tanod sa barangay.
Nakalatid usab sa MOA nga ang duha ka partido magtinabangay sa paghatag sa public services, seguridad, kultural, panginabuhian ug malambuong kalihukan sa maong barangay.
Gibutyag usab ni Ayuman ang mga nahatag nga kaayuhan sa CentCom ngadto sa ilang barangay sama sa pagselebrar nila sa Kadasig Festival diin ni-deploy og duha ka platoon ang CentCom aron motabang sa pagmentenar sa peace and order, ni-donate kinig luna alang sa ilang Material Recovery Facility ug uban pa.
"Actually last October diha namo na discuss unsaon pagtinabangay, gusto niya nga mas mahapsay ang atong lugar. Gusto pud niya nga ma-change ang interpretation sa mga tawo nga abi AFP mga strikto, gusto niya nga makaana ang mga tawo nga andam sila moserbisyo sa mga tawo," asoy pa ni Ayuman sa The Freeman ug Banat News.
Bisan og ang MOA pirmahan pa karong Disyembre 5, gipasalig sa kapitan nga mabatyagan sa mga residente ang seguridad sa lugar.
Sunod semana, gilauman nga ang duha ka partido mohatag sa ilang proposal nga ilakip sa MOA. (BANAT NEWS)
- Latest
