Mandaue City ug Ayabe City, Japan sister city na

CEBU, Philippines - Nagtagbo na ang mga opisyal sa Dakbayan sa Mandaue nga gipangulohan ni Mayor Luigi Quisumbing ug ang mga opisyal sa Ayabe City sa nasud sa Japan ug natigayon na kagahapon ang pormal nga pagpinirmahay sa   sisterhood agreement sa tali sa duha ka dakbayan.

Si Mayor Quisumbing niingon nga daghang kaayohan ang mapaabot sa Mandaue sa pagpakiglambigit sa Ayabe City nga gipangulohan ni Mayor Zenya Yamazaki kinsa mapasalamaton kaayo sa gipakitang pagtagad ngadto kanila sa labing unang higayon sa ilang pagbisita sa maong siyudad.

Matud ni Mayor Yamazaki nga ang ilang lugar usa ka highly urbanized city ug iyang gipaniguro ang panagbinayloay sa mga kaayohan nga naglakip sa ilang pagpadala sa ilang mga batan-ong tinun-an alang sa pagtungha sa English nga pinulongan, mga pabrika ug uban pa

Sa duha ka adlaw nga pagbisita sa dakbayan sa mga opisyal sa Ayabe City, ilang gisusi ang mga pabrika sa Mandaue nga naglakip sa San Miguel Brewery Inc. ingon man furniture industry sa dakbayan ug uban pa.

Gisaksihan sa mga opisyales sa dakbayan sa Mandaue ang pagpinirmahay nilang Mayor Quisumbing ug Mayor Yamazaki sa sisterhood agreement nga gihimo sa session hall. (BANAT NEWS)