Parada batok illegal drugs gilusad
CEBU, Philippines - Nakighiusa kagahapon sa kapulisan ang mga kanhi manuyupay nga nagbag-o na sa ilang kinabuhi atol sa grand parade nga maoy pormal nga mibukas sa Drug Abuse Prevention and Control Month sa Dakbayan sa Sugbo.
Misalmot usab ang liboan ka mga estudyante, mga opisyales sa City Hall, ug kapulisan gikan sa Cebu City Police Office ug Police Regional Office-7 sa parada nga nagsugod sa Fuente Osmeña rotunda paingon sa Cebu City Sports Center.
Usa sa mga nisalmot si “Jason,” 32 anyos, nga miangkon sa Banat News nga siya manuyupay kaniadto apan mibiya siya niini tungod sa kahadlok nga basin mamahimo kining hinungdan sa iyang kamatayon.
Matud ni Jason, dili pa ulahi nga magbag-o alang sa mga drug surrenderers sa Oplan Tokhang. Usa siya sa nanumpa nga isalikway ang drugas nga maoy highlight sa opening salvo nga gitawag og “Independence Day Against Illegal Drugs.”
Sa iyang mensahe nga gibasa ni Regional Police Deputy Dir. Rey Lyndon Lawas, giawhag ni Police Regional Office-7 Director Noli Taliño ang mga Sugbuanon nga padayong mosuporta sa kampanya sa kapulisan sa pagbuntog sa problema sa ginadiling drugas.
Sumala pa ni Taliño, dako og ikatabang ang kooperasyon sa komunidad sa ilang kampanya.
Si Atty. Paul Oaminal, presiding officer sa Cebu City Anti-Drug Abuse Council nga maoy miorganisar sa parada kagahapon mipasabot nga gisaulog karong buwan sa Nobiyembre dinhi sa Sugbo ang Drug Abuse Prevention and Control Month. (BANAT NEWS)
- Latest