Talisay di na palabay sa basura

CEBU, Philippines - Hugot na gyud sa iyang baruganan si Talisay City Mayor Eduardo Gullas nga dili mopalabay og basura sa ilang landfill gikan sa ubang siyudad o lugar.

Kini human sa iyang gihimo nga konsultasyon sa iyang mga department heads, sa konseho ug sa mga opisyal sa Barangay Tapul.

Sayo niini si Gullas bukas sa pagdawat sa basura sa ubang lugar nga ilabay sa ilang landfill sa Tapul.

Gani si Kapitan Mary Ann Nolasco hugot sab sila nga dili gyud mosugot nga aduna pay laing siyudad nga molabay sa ilang labayanan nga naa sa iyang barangay.

Nagkanayon si Nolasco nga karon gani nga ang basura ra sa Talisay ang ilang gipalabay nangreklamo na sila sa kabaho.

Asoy pa niya nga gahi kaayo og ulo ang ubang drayber tungod kay dili nila tabunan ang ilang mga garbage truck hinungdan nga magtagak-tagak ang mga basura.

Matud ni Mayor Gullas nga hangtud gyud karon hinuon wala gyuy pormal nga hangyo gikan sa Siyudad sa Sugbo sa paglabay og basura.

Ang konseho sa Talisay pinanguluhan ni Bise Mayor Alan Bucao ang nisupak sab nga palabayon sa ilang basura ang ubang lugar tungod kay hapit na sab kini mapuno. (BANAT NEWS)