“Holy Door” tak-upan na karong Domingo
CEBU, Philippines - Hingpit nang tak-upan karong adlaw’ng Domingo ang Holy Door sa Archdiocese of Cebu nga nahimutang sa Cebu Metropolitan Cathedral.
Gipahibawo ni Msgr. Ruben Labajo, ang Team Moderator sa Cebu Metropolitan Cathedral nga usa ka santos nga misa ang ipahigayon sa alas 9:30 sa buntag karong Domingo apan sa dili pa ang misa usa ka seremonyas sa pagsira sa Holy Door ang pagabuhaton nga himuon ni Cebu Archbishop Jose Palma.
Si Labajo, niawhag sa tanang magtutuo nga wala pa makasulod sa Holy Door sa pagsulod na sa dili pa kini sirad-an aron makadawat og indulhensya ug sigurohon lang nga anaa sa state of grace diin nakahuman na sa pagpangumpisal.
Sumala pa ni Labajo nga ang pagsulod sa Holy Door, mag-ampo usa sa kredo sa pag-ampo, Amahan Namo, Maghimaya Ka Maria ug Himaya sa Amahan aron makadawat sa indulhensya plenarya.
Si Archbishop Jose Palma, niawhag sa mga magtutuo sa pagbisita sa mga Holy Door sa dili pa kini tak-upan isip pagpakita sa gugma ni Kristo ug kalooy sa tanang katawhan ilabi na sa mga nanginahanglan. (BANAT NEWS)
- Latest
