Asawa giluba sa bana’ng dunay ‘sakit sa utok’

CEBU, Philippines - Nakabsan sulod sa tambalanan ang 35 anyos nga asawa human kini giluba sa iyang bana samtang natulog tapad sa ilang mga anak sa Brgy. Consolacion sa Lungsod sa Dalaguete pasado alas 9 sa nakalabay nga gabii.

Ang biktima giila nga si Maria Batoctoy, samtang nalandig sa tambalanan ang iyang bana nga si Antonio Batoctoy human kini napusilan sa ilang silingang polis nga maoy unang nakaresponde sa hitabo.

Ang hepe sa Dalaguete Police, PSInsp. Abell Laborte niingon nga sa nakuha nilang impormasyon, posibling gumikan sa drugas nahimo sa bana ang kremin ug lagmit sab wala kini maka-inom sa tambal niini sa problema sa utok.

Sumala pa ni Laborte nga samtang nagtan-aw og TV ang bana ug natulog ang asawa niini tapad sa ilang lima ka anak, kalit lang kining nikuha og kutsilyo ug giluba ang iyang asawa. Gipangsunog sab niini ang ilang mga gamit sa balay hinungdan nga niulbo ang kayo.

Ang silingan nila nga polis nga si PO3 Maximo Belcina maoy unang nakaresponde sa hitabo dihang napahibalo kini sa ilang mga silingan.

Sa pagresponde ni Belcina, nakita niini si Maria nga naligo sa iyang dugo ug sulay nga gitabang, apan sa dihang nakit-an kini sa bana, gi-ataki hinuon kini gamit ang kutsilyo hinungdan nga napusilan sa polis ang bana makaduha ka higayon.

Gitabang sa mga silingan ang mga bata nga na-trap sa nasunog nga balay hangtud nga napalong ang kayo.

Gidala pa sa tambalanan sa Dalaguete si Maria apan nakabsan gyud kini sa iyang gininhawa, samtang gidala sab sa Vicente Sotto Memorial Medical Center ang iyang bana.

Ang impormasyon sa hitabo nakuha sa kapolisan gikan sa testimoniya sa mga anak sa magtiayon diin ang kamagwangan nag-edad og 13 anyos.

Si Laborte niingon nga sa nakuha nilang impormasyon gikan sa mga silingan, naggamitan og drugas ang  bana. Apan nakakuha sab sila og impormasyon nga duna kini tambal nga gi-maintain alang sa problema sa utok hinungdan nga di pa sila makatug-an kun unsa ang motibo sa kremin.

Kasong parricide, arson ug direct assault ang ipasaka sa mga polis batok sa suspetsadong bana. (/DILT)  (BANAT NEWS)