Albuera Mayor Espinosa gipatay

CEBU, Philippines - Ang mayor sa Albuera, Leyte nga si Rolando Espinosa Sr. ug laing piniriso napatay sa kapolisan atol sa giingong pinusilay sulod sa Leyte Sub-Provincial Jail sa Baybay City kagahapon sa kaadlawon.

Apan daghan ang nagtuo nga ang gihimo sa mga sakop sa PNP Criminal Investigation and Detection Group (CIDG)-Region 8, usa ka lakang aron sa pagpahilom ni Espinosa nga mibutyag og daghang ngalan sa mga tawo nga giingong nalambigit sa negosyo sa drugas sa iyang anak.

Si Espinosa maoy amahan ni Kerwin Espinosa nga giingong labing dakong drug lord nga nag-operate sa Region-8. Apil kanila mao si Senador Leila De Lima, mga lokal nga opisyal ug kapolisan. Si Espinosa gibilanggo tungod sa kaso kay ang iyang balay nasakmitan og P88 milyones nga kantidad sa shabu ug daghang armas dihang gironda kini sa kapolisan pipila ka buwan ang milabay.

Tungod sa pagbutyag ni Espinosa sa ngalan sa daghang inpluwen-siyadong mga tawo nga giingong kakunsabo o kaha protektor sa negosyo nga drugas sa iyang anak, daghan ang nagtuo nga kini ang rason nga siya gipatay bisan diha na sulod sa bilanggoan.

Tungod sa pagtuo nga gituyo pagpatay si Espinosa, si Eastern Visayas PNP director Elmer Beltejar mimando sa PNP Regional Internal Affairs Service nga imbestigahon ang pagkapatay nila ni Espinosa ug sa laing binilanggo nga si Raul Yap. Ang mga sakop sa CIDG-8 nangangkon nga misukol kanila sila si Espinosa ug Yap ug nga may nakuha silang armas gikan kanila human sila mapatay, apan daghan ang wala mituo niini.

Ang grupo sa CIDG nga gipangulohan ni Chief Inspector Leo Lagara mironda sa bilanggoan sa Baybay City alas 4:10 kagahapon sa kaadlawon base sa duha ka search warrant para kanila ni Espinosa ug Yap.

Si Espinosa maoy subject sa search warrant sa paglapas sa Firearms Law samtang si Yap subject usab sa search warrant kay matud pa nagtipig kini og daghang shabu sulod sa iyang selda. Ang search warrant giisyu ni Regional Trial Court (RTC) Branch 30 Judge Tarcelo Sabarre Jr. nga nagtugot nga siksikon ang selda nila ni Espinosa ug Yap.

Matud sa direktor sa PRO-8 nga wala kaayo sila’y kasayuran sa nahitabo nga pag-raid sa bilanggoan nga gidumala sa probinsiya sa Leyte  kay wala mo-coordinate kanila ang mga sakop ni CIDG-8 director Marvin Wayne Marcos.

Nasubo si Beltejar sa pagkamatay ni Espinosa kay nabalaka siya nga basin makapalugak kini sa kalig-on sa mga kaso nga ipasaka nila batok sa mga tawo nga gitumbok sa mayor nga kakunsabo sa negosyo sa ilegal nga drugas sa Leyte.

Apan dunay piskal nga miingon nga bisan og napatay si Espinosa magpadayon ang kaso nga ipasaka nila batok sa mga kakunsabo ni Kerwin Espinosa sa pagpamaligya og shabu.

Armas ug mga shabu

Ang mga miresponde nga sakop sa PNP Scene of the Crime Operations (SOCO) didto sa dapit nga nahitaboan sa giingong pinusilay kagahapon na sa buntag, nakakaplag og Super caliber .38 automatic pistol ug usa ka gamay’ng pakete sa shabu nga giingong iya ni Espinosa.

Samtang nakaplagan usab gikan sa selda ni Yap ang usa ka kalibre 45 nga pistola nga may mga bala ug mga pinakete nga adunay sulod nga gituohang shabu.

Ang tigpamaba sa Camp Crame nga si Sr. Supt. Dionardo Carlos miingon nga aduna gyuy imbestigasyon nga pagahimoon kabahin sa maong hitabo.

Gawas sa mga sakop sa Regional Internal Affairs Service (RIAS), ang direktor sa PRO-8 mihulma na usab og usa ka grupo sa mga imbestigador aron mohimo og buwag nga imbestigasyon.

Matud ni Beltejar nga sutaon sa mga imbestigador kun gituman ba ang tukma nga mga lagda sa pagpahigayon og pagpangronda, ilabi na sa pagpatay sa mayor ug sa kaubang binilanggo.

Adunay trustee inmate nga mitug-an sa iyang nakita nga si Espinosa miisa pa gani sa iyang kamot sa wala pa pusila sa mga polis.

Ang pag-surrender

Si Espinosa mi-surrender ngadto ni PNP Chief Ronald Dela Rosa kaniadtong Agosto pipila ka adlaw human sa nahitabong pinusilay sa mga polis ug sa iyang mga goons didto sa ilang panimalay.

Giangkon ni Espinosa nga ang iyang anak nga si Kerwin, usa ka drug lord nga maoy nagpayuhot og drugas sa lainlaing dapit sa Leyte ug adunay daghang nagproteher sa iyang negosyo.

Si Espinosa mibalik sa iyang pagka mayor apan didto na magkatulganan sa police station sa Albuera kay nahadlok nga may mopatay kaniya didto sa iyang panimalay.

Apan kaniadtong Oktubre 5, gidakop si Espinosa sa mga polis human malutsi og warrant of arrest tungod sa pagkasakmit sa daghang shabu ug mga armas sa iyang panimalay. Ang iyang anak nga si Kerwin nadakpan usab sa mga polis samtang nagtago-tago didto sa Abu Dhabi, United Arab Emirates kaniadtong miaging buwan ug gipaabot nga dad-on kini pagbalik dinhi sa nasud kun mahuman na ang deportation proceedings. (Miriam Garcia Desacada, Edgar Allan Vilbar ug Rowena D. Capistrano/RUB)