Gullas nilimpyo sa ngalan; 5 ka kagawad gimonitor

CEBU, Philippines - Mibisita sa buhatan sa director sa kapolisan sa Police Regional Office-7 si City of Talisay Mayor Eduardo Gullas uban ang iyang apo nga si Congressman Samsam Gullas human narelibo ang hepe sa Talisay City Police pipila ka adlaw na ang nilabay.

Si Mayor Gullas nipasalig kang PCSupt. Noli Taliño nga bisan og narelibo sa pwesto si PSupt. Aileen Recla, magpadayon ang ilang suporta sa kapolisan batok sa ilegal nga drugas.

Gitataw sa mayor nga ang pagrelibo kang Recla posibleng gamiton unya sa ilang mga kaatbang ug ilambigit sila sa ilegal nga drugas. Gitug-anan ni Taliño ang mga Gullas nga ang pagrelibo ni Recla gimando sa Internal Affairs Service uban sa 20 ka non-uniformed police sa rehiyon 7 ug gipa-report sila sa Campo Crame.

Gitug-an sab ni Taliño nga wala naapil sa bisan unsa nga pasangil ang mga Gullas kabahin sa illegal drugs base sa iyang nahibaw-an.

Samtang ang bag-ong hepe sa Talisay nga si PSupt. Emerson Dante niingon nga nibisita ang mga Gullas kang Taliño aron limpyohan ang ilang pangalan. Gitutokan sab karon sa Danao City Police ang lima ka barangay officials nga gidudahang nalambigit sa ilegal nga drugas.

Ang hepe niini nga si PSIns. Alejandro Batobalonos nitataw nga dili pa nila matumbok kun gikan ba ni Barok ang suplay sa shabu sa maong mga kagawad ug sa suspected drug lord nga si Alvaro Alvaro kinsa nagtingkagol na sa provincial jail.

Si PSupt. Richard Oliver, tigpamaba sa Cebu Provincial Police Office niingon nga ilang gipanglantawan nga daghang local government officials ang gidudahang nalambigit sa ilegal nga drugas.

Usa ka opisyal sa kapolisan nga nagdumili sa pagbutyag sa iyang ngalan niingon nga sa ilang listahan sa narco-politicians, lakip niini ang mga barangay opisyal nga nagtinguha pa gani sa pagpasubli sa katungdanan kun nahinayon pa ang barangay elections.

Kahinumduman nga napatay atol sa buy-bust operation sa Danao City Police si Malapoc Barangay Councilor Amador Capin kinsa giila nga high-level target pusher sa maong siyudad human kini namusil sa poseur buyer niadtong Oktubre 30 sa gabii.