4 barangay sa Lapu-Lapu abansada sa bagyo

CEBU, Philippines - Giila ang upat ka barangay sa Dakbayan sa Lapu-Lapu nga peligro kung mahitabo ang storm surge.

Matud ni Andy Berame, officer-in-charge sa Lapu-Lapu City Disaster Risk Reduction and Management Office, nga ang Barangay Tingo ug Baring sa Isla sa Olango ug ang Ibo ug Buaya sa siyudad mao ang lugar nga maapektuhan og bagyo.

Ang bagyo nga nakahatag og danyos sa siyudad mao ang Ruping sa tuig 1990.

“After pila ka years, wala, ang northern part na sa Cebu ang maigo,” matud ni Berame.

Sa pagsulod sa bagyong Lawin, gitataw ni Berame nga walay direktang hulga ang dakbayan tungod ang agi sa maong bagyo pasaka padulong sa Catanduanes ug mogawas sa West Philippine Sea.

Sa pagkakaron, permanenteng nag-monitor ang iyang opisina ug kanunay’ng mohatag og abiso gikan sa PAGASA alang sa mga residente.

Bahin sa mga motor banca nga mobiyahe padung og pabalik sa isla, nihangyo si Berame ngadto sa mga boat operators nga kung mo-release og abiso ang weather agency ug coast guard nga dili pabiyahion kung dunay gail warning, ila kining sundon tungod kay ila kining responsibilidad.

Atol sa baha sa siyudad, giila ni Berame ang Barangay Basak nga bahaanan tungod kay lupa kini ug mag-overflow ang drainage ingon man nga duna gihapoy magpataka og labay sa basura sa maong dapit.

Usa ka declogger truck nga gipanag-iya sa siyudad ang gamiton aron sa pagkuha sa mga basura sulod sa drainage, matud ni Berame.

Ang maong declogger truck napalit sa siyudad karong tuiga sa kantidad nga P38 milyones.

Sa pagkakaron, si Berame niingon nga padayon sila sa pag-monitor sa siyudad sa mga bagyo ug baha ug kanunay silang nakig-alayon sa City Engineering Office. (BANAT NEWS)