Hangyo nga police station kuralon

CEBU, Philippines - Ang hepe sa kapolisan sa Talisay mohangyo ni Mayor Eduardo Gullas nga matabangan sila nga makural unta ang ilang police station tungod sa mga hulga nga sila bombahan.

Matud ni Superintendent Aileen Recla nga nakadungog na siya og mga plano gikan sa ulohan nilang buhatan nga tukoran sila og bag-ong police station.

Apan si Recla miingon nga samtang nagpabilin pa lang kini nga plano sa ilang ulohang buhatan, gusto unta niya nga makural ang ilang police station, ilabi na kay daghan na ang naglagot kanila gumikan sa ilang subsob nga kampanya batok sa ilegal nga drugas ug sugal.

Si Recla nitug-an nga nakadawat sila og hulga, gani may hulga pa nga bombahan ang ilang police station. Matud pa nga ang hulga nagkanayon “Kanus-a ka mopahawa sa Talisay Aileen Recla? Imong giguba ang among buhay-buhay.”

Ang hulga gipaagi sa ilang mga selpon, ug gani giapil pa ang ilang hotline number. Nagtuo si Recla nga ang naghimo niini mao kadtong mga ilegalista nga naapektohan sa ilang hugot nga kampanya.

Matud ni Gullas nga pagahinan niya og budget ang pagpakural sa police station sa sunod tuig nga budget. (BANAT NEWS)