Tulo ka drug pushers nanukol napatay sa police operations

CEBU, Philippines - Tulo ka mga gipasanginlang mga notadong drug pushers ang namatay sa managlahing anti-illegal drugs operations sa kapolisan.

Patay ang giingong level 2 drug pusher sa Sitio Taboc, Brgy. Camalig Bato sa Dakbayan sa Danao human nakigpinusilay sa mga sakop sa kapulisan nga giila nga si Regine Lao, alyas “Rigrig.”

Sumala pa sa hepe sa Danao City Police, Sr. Insp. Alejandro Batobalonos nga nahinabi sa Banat News nga taudtaod na nilang gipanid-an si Lao human ilang nasayran nga nalambigit kini sa negosyo sa drugas.

Matud ni Batobalonos idlas ang suspetsado kay pilian kaayo kini og kostumer ug buntag hangtod hapon lang kini mobaligya og shabu aron iyang makita ang iyang ka-transaksyon.

Atol sa operasyon nakabantay kini nga polis ang iyang kaatubang ug daling midagan sulod sa iyang balay ug nanirado sa pultahan, apan dihang ilang gisundan kalit silang gipamusil niini nga gipalapos lang sa pultahan ang bala.

Tungod niini, mibawos og pusil ang mga polis ug naigo ang suspek diha sa sulod. Gipaubos na kini sa Oplan Tukhang apan mitago kini sa iyang balay sa dihang gibisita sa mga polis.

Narekober sa Danao Police gikan sa suspetsado ang usa ka .45 caliber pistol nga dunay mga bala, mga dagkong putos sa gituohang shabu nga mikantidad sa P153, 872.00 ingon man ang buy- bust money nga P200.

Cordova

Samtang sa lungsod sa Cordova, napatay sa Cordova Police si Rolando Sumalinog  nga giingong tigpayuhot og drugas diha sa Sitio Sambagan, Brgy. Dapitan.

Matud pa napusilan kini dihang nanguna pagpusil sa mga polis apan mikagar iyang armas. Narekober sa mga polis gikan ni Sumalinog ang usa ka .38 revolver, siyam ka gagmay nga pakete ug usa ka medium size sa gituohang shabu,

Samtang nakuhaan usab ang igsuon niini nga si Ramil og usa ka .38 revolver.

Mandaue

 Patay  usab ang gidudahang drug pusher nga mibalik pagpamaligya og drugas human nitahan sa Oplan Tukhang sa miaging buwan dihang napusilan kini sa mga sakop sa City Anti-Illegal Drug Special Operation Task Group (CAIDSOTG) sa Mandaue City Police Office (MCPO).

Ang hepe sa CAIDSOTG nga si Chief Inspector Wilbert Parilla ug  Senior Inspector Pedy Noval maoy nangulo sa buy-bust operation ug maoy ilang target si Reynaldo Repuela alyas Renren, 52.

Apan matud pa pag-adto sa mga polis sa iyang balay, adunay usa ka wala mailhing lalaking nagbarog sa gawas sa balay ni Repuela ang kalit nga namusil kang Police Officer 3 Benjie Abapo apan wala kini makaigo.

Dali nga midagan ang namusil ug nahitabo ang ginukdanay ug  si Repuela nga didto sa sulod sa panimalay nasigpatan kini nga mikuha og armas apan giunhan kini sa pagpusil sa mga polis nga nakaingon sa hinanali niining kamatayon.

Sa crime scene maoy nakuha sa kapolisan ang kalibre 38 nga armas ug shabu nga nagkantidad og P361,200.  (BANAT NEWS)