Naanad na pag-eskuyla

CEBU, Philippines -Dinhi sa dakbayan, panagsa ra nga adunay mga bata nga manghilak kun biyaan sa ilang mga ginikanan nga muhatod kanila sa ilang classrooms.

Kini tungod kay sagad sa mga bata nga motungha sa Grade 1, nag-agi na og Kinder 1 ug Kinder 2, mao nga naanad na sila nga biyaan sa ilang mga inahan ug mga yaya panahon sa klase.

Apan sa mga tunghaan sa probinsya nga daghang bata moderitso ra pagtungha sa Grade 1 nga wala mag-agi og Kinder, gubot kaayo kay ang mga bata dili magpabiya sa ilang mga mama.

Mga tinugyanan sa DepEd miawhag gyud sa mga ginikanan nga dili unta pabawnan og mga junk foods ang ilang mga anak. Matud ni Dagatan nga mas bentaha nga pagkaon g’yud nga adunay mga bitamina ang ilang ipabawon sa mga bata.

Problema sa trapiko

Ang kadagkoan sa kapolisan ug mga traffic enforcers nagtuo gyud nga grabeng problema sa trapiko ang masinati karong adlawa atol sa pagbukas pagbalik sa klase.

Matud ni Chief Inspector David Señor, hepe sa operations branch sa Cebu City Police Office (CCPO), nga mopakatap sila og daghang polis gikan sa Traffic Patrol Group (TPG) aron makaabag sa mga traffic enforcer, ilabi na duol sa mga tunghaan.

Si Señor miingon nga gihangyo na usab nila ang mga civilian peace volunteers nga moabag kanila sa ilang gimbuhaton, ilabi na karong buntag. Ang CCPO mitakda nga mopakatap og daghang unipormadong polis nga makabantay sa mga tinun-an duol sa mga tunghaan.

Ang matag tunghaan destinohan og labing menus tagduha ka polis ug kun mo-off na sila sa ilang duty, pulihan na usab og laing duha ka polis, aron kabantayan ang mga tinun-an, labi na kadtong nagtungha sa gabii.

Gawas sa mga polis nga idestino sa matag tunghaan, ang nagdumala sa mga police patrol cars gimandoan na usab nga mopatrolya sa mga dapit nga adunay tunghaan.

Prayoridad nga patrolyahan kanunay sa mga polis mao ang Mabolo Elementary School, Lahug Elementary School ug Cebu City Central School.

Apan giawhag sa kapolisan ang mga ginikanan nga dili padad-on og mahalong mga butang ang ilang mga anak nga makapatintal sa mga badlungon. Jojo C. Ugdol ug Rene U. Borromeo  (BANAT NEWS)