Tubig sa Jaclupan dam daghan na

CEBU, Philippines - Nadugangan na ang supply sa Metropolitan Cebu Water District tungod sa pagsaka sa water level production sa Jaclupan dam sa Dakbayan sa Talisay nunot sa pag-uwan.

Gibutyag ni Edwin Correos, public relations division manager sa MCWD, nga atol sa huwaw, sagad sa mga apektado sa hinay nga agas sa tubig ang mga konsumedor sa Talisay paingon na sa downtown area sa Siyudad sa Sugbo.

Epekto niini mao nga naa na lang sa duha ngadto sa tulo ka oras ang agas sa tubig sa gripo.

Nunot sa pagsaka sa water level production sa Jaclupan dam, niabot na sa 14,000 cubic meters per day ang supply gikan sa 6,000 cubic meters per day. Tungod niini ang oras sa agas sa tubig nisaka usab gikan sa tulo ngadto sa unom ka oras matag adlaw.

Gihulagway ni Correos nga walay laing tinubdan aron molambo ang water level production gawas lang sa uwan.

Nunot niini niawhag ang MCWD sa publiko nga mag-ampo nga unta daghan pa ang moabot nga uwan aron hingpit nga makabalik sa normal nga water level production ang Jaclupan dam nga 33,000 cubic meters per day.

Hangyo sa MCWD sa katawhan nga dili mag-abusar sa paggamit sa tubig ug magdaginot lang gihapon ug bantayan nga dili moawas ug ang mga guba nga tubo ug gripo kinahanglan ayuhon.

Samtang ang Buhisan dam wala pa gihapon nisaka ang tubig hinungdan nga ang mga dapit sama sa Barangay Labangon, Katipunan, V. Rama ug Taboan sa Dakbayan sa Sugbo nakasinati pa gihapon og low pressure to no water.

Hinuon giklaro sa ahensiya nga ang Buhisan dam abag lang kini sa Jaclupan dam sanglit gamay ra man usab kini og kapasidad. (BANAT NEWS)