18 pa ka barangay wa mouli sa mga sakyanan
CEBU, Philippines - Moabot pa og 18 ka mga barangay sa Dakbayan sa Sugbo ang wala gihapon mouli sa mga nagkalainlaing sakyanan sa siyudad nga gipagamit aron iimbentaryo.
Sumala ni Ronald Malacora, assistant Department Head sa General Services Office nga ang 18 ka mga barangay mao ang barangay Apas, Basak Pardo, Basak San Nicolas, Buot, Cambinocot, Ermita, Inayawan, Kamagayan, Labangon, Lorega San Miguel, Pamutan, Punta Princesa, Sambag I, San Antonio, Suba, Tagbao, Tinago ug Barangay Tisa. Nasayran nga sagad kanila pulos mga sakop sa oposisyon nga Team Rama apan sila miinsister nga ang maong mga sakyanan gikinahanglan nila alang sa emergencies.
Ang Carreta ang kinaulahian nga barangay nga niuli sa sakyanan kagahapon.
Mipadayag si Malacora nga ang Adlaon na isyuhan pagbalik sa ilang L300 nga sakyanan tungod kay adunay pasyente nga nanginahanglan gayud og sakyanan aron dad-on kini sa tambalanan.
Mipasabot usab si Malacora nga kung kinahanglan gyud sa mga barangay ang emergency vehicles andam iuli ni acting mayor Margot Osmeña ang ilang mga sakyanan pinaagi sa pagpadala og suwat kang Osmeña.
Wala pay giuli nga mga Toyota Hi-Lux ngadto sa mga kapitan gawas lang sa mga L300 vans, multicabs ug motor.
Kahinumdoman nga si Osmeña mipasaka og reklamo batok sa 43 ka opisyal diha sa Ombudsman tungod sa wala pag-uli sa mga sakyanan. Aaron A. Sagaoinit and Racshell N. Sanchez (BANAT NEWS)
- Latest