17 anyos patay sa SRP
CEBU, Philippines - Dead on arrival sa tambalanan ang usa ka 17-anyos nga lalaki human misampak sa usa ka multicab ang iyang gimaneho nga motorsiklo diha sa may intersection sa usa ka mall sa South Road Properties dinhi sa Dakbayan sa Sugbo alas 3 sa nakalabay nga kaadlawon.
Grabeng angol sa ulo og mga bali sa lawas ang naangkon ni Jovanie Orapa, nga taga Sitio Sto. Niño, Brgy. Inayawan ning dakbayan, samtang ang drayber sa multicab giila nga si Hamilton Omayao, 45, nga taga San Roque, Dakbayan sa Talisay.
Matud pa ni Police Officer 2 Chady Jungoy, imbestigador sa Traffic Patrol Group nga nahinabi sa Banat News nga miliko og kalit ang multicab nga gikan sa direksyon sa Talisay ug mao say paglabay sa motorsiklo sa biktima gikan sa habig sa Ludo Bridge ug wala na nakapreno.
Sumala pa ni Jungoy nga nagsuot pa og helmet ang biktima apan wala kini nakatabang kaniya kay natangtang man kini. Ang eskina sa SM SeaSide bawal ang mo-left turn gikan sa Talisay kay kinahanglan pang mosuong ilawom sa Ludo Bridge.
Si Jungoy mitug-an nga naghupot lang og student permit nga lisensya ang batan-on, kinahanglan gyud unta nga aduna kini kaubang professional driver.
Gidala pa ang batan-on sa Cebu City Medical Center, apan nakabsan gayod kini sa iyang kinabuhi. (BANAT NEWS)
- Latest
