Kapolisan nangandam sa klase

CEBU, Philippines - Hugot na nga gipangandaman sa kapolisan ang pag-abli sa klase sama sa pagpakatap og mga polis nga mobantay sa mga tinun-an karong Hunyo 13.

Matud ni Chief Inspector David Señor, hepe sa operation sa Cebu City Police Office, nga 233 ka polis ug 62 ka traffic enforcers ang ipakatap sa nagkalain-laing eskwelahan sa dakbayan.

Kini aron mamintinar ang kahapsay ug malayo sa krimen ang mga tinun-an sa publiko ug pribadong tunghaan.

Ang kapolisan gimanduan  nga mobantay sa pagsulod ug paggawas sa mga estudyante sa eskwelahan.

Lakip sa pabantayon ang mga barangay tanod sa dagan sa trapiko aron malikay ang mga tinun-an sa aksidente.

Andam usab ang mga anti-crime tips ug guide nga gihimo aron iplastar sa mga eskwelahan aron makatap ang impormasyon kung unsaon paglikay nga mabiktima sa krimen.

Ang kapolisan nitabang usab sa mga ginikanan ug tinun-an sa Brigada Eskwela sa Zapatera Elementary School ug High School sa Dakbayan sa Sugbo.

Si Superintendent Oscar Monterroyo, hepe sa Police Community Relation Branch sa CCPO, nagkanayon nga ang pagpanglimpyo, pagpamintal, pag-ayo sa guba nga lingkuranan ug uban pang kinahanglanon sa eskwelahan maoy usa sa mga gihimo nila isip pagpangandam sa pag-abli sa klase.

Ang Brigada Eskwela gisugdan niadtong Lunes ug matapos karong adlawa.

Lainlaing eskwelahan ang adtuon sa kapolisan matag tuig.

Samtang gikatakda nga mopahigayon og inspeksiyon sa mga school transport services sunod semana ang Land Transportation Franchising and Regulatory Board  isip pagpangandam sa pagbukas sa klase.

Gibutyag ni Reynaldo Elnar sa LTFRB-7 nga ilang inspeksiyonon sunod semana ang mga school transport services sa pribado ug pangpublikong tunghaan sa rehiyon 7.

Dugang ni Elnar nga ang mga individual operators sa pagsugod na gyud sa klase nila inspeksiyonon sanglit kinahanglan man sila tagsa-tagsaon kung nituman ba gyud sa rekisitos.

Usa niini ang pagbutang og seatbelt sa mga lingkuranan.

Gawas niini, kinahanglan usab nga may first aid kit ug kun abli ang bintana kinahanglang may rihas o grills aron ang mga siko sa mga bata dili mogawas.

Gihimug-atan ni Elnar nga walay pili ang rekisitos ug angay kini tumanon sa tanang tunghaan hinuon nasuta nga kun dunay mga kakulian nga makita ang ahensiya ila dayon kining pakorehian ug dili padaganon.

Sa pagbukas sa klase sagad sa mga problema nga masugatan sa LTFRB-7 mao ang mga kolorum nga mga sakyanan.

Hinuon matud ni Elnar nga minus na lang kini karon gumikan kay daghan na ang nikuha og prangkisa ug tungod usab sa kadaku sa multa base sa Joint Administrative Order. Eramy E. Sismar ug Decemay P. Padilla (BANAT NEWS)