Off-duty cop nga nakapusil og tulisan gihataga’g P20 mil
CEBU, Philippines - Personal nga gitunol ni Cebu City mayor-elect Tomas Osmeña kang Police Officer 3 Julius Regis ang P20 mil nga pahalipay sa pagkapusil niini sa duha ka mga tulisan sa miaging adlaw human ang duha nanulis sa usa ka jeep pasaheroan.
Si Regis nakahilak human niya nadawat ang maong ganti gikan sa mayor. Matud niya wala siya mag-apas og ganti kay ang nasud sa iyang hunahuna nianang tungora kadtong tiguwang nga apil sa gitulis kay nasud sa iyang hunahuna iyang inahan.
Si mayor-elect Tomas Osmeña nagkanayon nga P20 mil ra ang iyang gihatag sanglit wala mapatay ang maong mga tulisan.
“If wounded it’s only P5,000 pero atong hatagan og konsiderasyon nga off duty man siya, so double bonus na niya. Duha man sila (tulisan) di bale P20 mil,” pasabot ni Osmeña.
Mikomedya si Osmeña nga nakadaginot siya sa kwarta pero dili kini mao ang iyang tuyo kundi gusto niya nga ipakita ngadto sa mga badlongon nga seryoso kini kontra krimen.
Gipasalig niya nga di gikan sa panudlanan sa siyudad ang ganti, apan wala kini limitasyon ug midugang nga “the more the merrier.”
Ang hepe sa CIB nga si Senior Supt. Michael Anthony Bastes miingon nga nalipay siya para sa iyang sakop, apan miklaro nga wala sila mag-apas sa reward apan miangkon usab siya nga nakadasig kini sa kapolisan pagbuhat sa ilang responsibilidad.
Samtang, kagahapon usab nakigtagbo si Osmeña kauban ang iyang asawa nga si acting mayor Margarita Osmeña ngadto kang Archbishop Jose Palma kay gusto niyang ipaabot sa Simbahan nga abli ang ilang komunikasyon sa matag usa. (BANAT NEWS)
- Latest
