Oplan Pakigsandurot ibalik

CEBU, Philippines - Buot ni Cebu City mayor-elect Tomas Osmeña nga ibalik ang Oplan Pakigsandurot karong nahibalik na siya pagkamayor sa dakbayan.

Gahapon sa udto nagpatawag og meeting si Osmeña didto sa iyang panimalay sa Barangay Guadalupe uban si Cebu City Police Office (CCPO) Director Benjamin Santos ug ang mga hepe sa CCPO.

Ang Oplan Pakigsandurot usa sa mga programa kaniadto ni Osmeña nga paagi aron pagbuntog sa krimen sa siyudad.

Kadtong mga polis nga nagpuyo sa usa ka barangay kinahanglan nga makigtambayayong sa mga barangay tanod ug kinahanglan  mahibalo kini sa mga panghitabo nga krimen ug ilegal nga kalihokan sa ilang dapit.

“Police and barangay tanods will work hand and hand in their respective barangays,” matud ni Deputy City Director for Operation George pYlanan.

Matud ni Ylanan kinsa apil nga nitambong sa maong meeting nga igo lang nihatag si Osmeña og pointers sa gusto niya nga buhaton sa kapolisan kun molingkod na siya pagbalik.

Dugang pa ni Ylanan nga buot ni Osmeña nga ang Mobile Patrol Group kinahanglang moresponde dayon kun may mga  alarma gamay man o dako.

Apil na usab nga gitataw ni Osmeña sa meeting mao ang police blotter system diin kinahanglanon nga ma-blotter ang tanang panghitabo sa mga police stations ug police units sa dakbayan.

Tumong niini nga mabalik ang pagsalig  sa katawhan ngadto sa kapolisan sumala pang Ylanan. (BANAT NEWS)