6 LDRRM officers hayan mataktak
CEBU, Philippines - Gikabalak-an sa Provincial Disaster Risk Reduction and Management Office ang posibleng pagpapahawa sa mga local DRRM officers sa paglingkod sa bag-o nilang mayor.
Gibutyag ni Julius Regner, tigpamaba sa PDRRMO, nga dili mominus unom ka LDRRMOs sa probinsiya ang maapektuhan sama sa Barili, Medellin, Daanbantayan, Bantayan, Alcoy ug Argao.
Matud niya nga mismo ang ilang kaubanan ang nipahibalo na kanila nga alanganin na ang ilang posisyon kung molingkod na ang bag-ong mayor karong Hulyo.
"Duna siyay epekto ilabina sa mga LGU nga naapektuhan kay magsugod na sad og balik, pasabot mag-train na sad," matud ni Regner.
Matud ni Regner nga karon nga angay na mangandam ang mga lungsod alang sa umaabot nga La Niña, dili siya seguro kung makalihok ba ang mga LDRRM Office nga mawad-an og opisyal.
Plano sa PDRRMO nga makighinabi sa mga molingkod nga mayor nga dili lang hulipan o papahawaon ang mga LDRRM officers aron magpabilin nga lig-on ug makabarug ang buhatan nga natukod ilabi na karon nga adunay pangandaman nga katalagman. (BANAT NEWS)
- Latest