Gihulga nga biyaan sa kapuyo nanunggab

CEBU, Philippines - Anaa sa talandugon nga kahimtang ang usa ka babaye nga gidunggab sa Kabayoan, San Roque, Dakbayan sa Talisay niadtong nilabay’ng gabii.

Si Mylene Sumalpong, 33-anyos, ang nalandig sa Vicente Sotto Memorial Medical Center human nakaangkon og samad dinunggaban sa tiyan.

Apan ang paryente ni Sumalpong nga si Nonito Baterna, 46-anyos, minyo nga taga Matugawi, Poblacion, Lungsod sa Tabuelan, ang nakabsan sa iyang kinabuhi.

Ang 16-anyos nga anak ni Baterna nga si Jemwhell ang giatiman usab sa Talisay City District Hospital.

Matud ni PO3 Jason del Campo sa Talisay City Police Station nga naabot ang amahan ug anak nga Baterna sa giabangan nga balay ni Sumalpong ug sa iyang kapuyo nga si Nicole Visitacion, 50-anyos nga taga Bais City, Negros Oriental hapon sa adlaw sa hitabo. Tuyo sa mga Baterna nga tultulan sila ni Sumalpong kun hain dapita nagpuyo ang iyang asawa sa Tabunok. Apan  si Visitacion ang nanghagad una og inom uban sa ilang mga silingan.

Nilabay ang pipila ka oras nagkalalis si Sumalpong ug Visitacion sa walay igong hinungdan hinuon dali ra kining nahusay.

Dihang nakahukom na nga mobiya ang mga Baterna, nibuhi og pamahayag si Sumalpong nga iyang biyaan ang iyang kapuyo ug mokuyog sa kanhi kapuyo sa kauluhan.

Paglakaw sa mga Baterna, kalit nibutho si Visitacion ug sila gipangdunggab.

Nakaangkon og samad dinunggaban si Nonito sa wala nga kamot ug tiyan samtang ang anak niini samdan sa ibabaw nga bahin sa iyang lawas samtang sa tiyan ang samad ni Sumalpong.

Gidali og dala ang mga Baterna sa TCDH apan si Nonito ang nakabsan sa iyang kinabuhi samtang sa VSMMC gidala si Sumalpong.

Narekober sa kapolisan ang 13 pulgadang kutsilyo nga gigamit sa suspek sa pagdunggab.

Padayong gipangita sa kapolisan ang suspek human kini nisibat.

Sa laing bahin, nagkadugo nga gidala sa tambalanan ang usa ka lalaki human gidunggab sa walay igong rason sa batan-ong lalaki ala una sa kaadlawon sa nilabay’ng adlaw sa Sitio Panitogan, Sulangan, Bantayan.

Giila ang biktima nga si Antonio Coyoca, 44, minyo ug residente sa nahisgutang dapit samtang ang suspek mao si Rene Sevilleno, 19, ulitawo, residente usab sa maong lugar.

Si Police Officer 3 Vicente Chavez, imbestigador sa Bantayan Police Station, nagkanayon nga dili kaila ang duha ug nagkasugat lang kini sa maong dapit.

Matud ni Chavez nga ang suspek namahayag nga gipasanginlan siya sa biktima nga nisumbag kaniya hinungdan nga nikuha siya og hait nga hinagiban ug gidunggab kang Coyoca.

Apan ang kapolisan walay nakitang bun-og sa suspek.

Nisurender ang  suspek sa usa ka konsehal sa barangay Samyang, si Coyoca daling gidala sa Bantayan District Hospital human nakaangkon og samad dinunggaban sa tuong bahin sa dughan. (BANAT NEWS)