P.5M nga shabu nasakmit

CEBU, Philippines - Nasakmit sa kapolisan ang kapin sa P500,000 nga kantidad sa shabu gikan sa tulo ka pushers nga nadakpan sa buy-bust operation sa Pulpogan, Lungsod sa Consolacion alas 9 pasado kagahapon sa buntag.

Si Police Officer 3 Raymond Lleve sa Consolacion Police Station niila sa tulo nga sila si Marilyn Bruto, 35, minyo nga nagpuyo sa maong dapit; Edito Paredes, 39, taga Cubacub, Dakbayan sa Mandaue ug Mark Anthony Naveo, 29, minyo nga taga Dakbayan sa Carcar.

Si Bruto nakuhaan og siyam ka medium-size nga putos sa shabu, 14 ka gagmay nga pakete ug P1,400 nga gituohang halin sa pagpamaligya niini.

Si Paredes nakuhaan og usa ka medium-size nga pakete sa shabu ug mga drug paraphernalia samtang si Naveo nakuhaan usab og usa  ka medium-size nga shabu ug mga drug paraphernalia. Matud ni Lleve nga mokabat sa 42.47 gramo ang timbang sa tanang shabu nga nasakmit ug base sa Dangerous Drug Board (DDB) nga ang tanan mokabat kapin sa P500,000 ang kantidad.

Samtang 19 ka pakete sa shabu ang nasakmit sa kapolisan atol sa buy-bust operation sa Sitio Cogon, Esperanza, San Francisco alas 9 sa nakalabay nga gabii.

Ang dinakpan giila nga si Renier Ibarra, 37, minyo ug molupyo sa nahisgutang dapit.

Nakuha sa suspek ang 15 ka gagmay’ng pakete sa shabu ug duha ka medium-size lakip na ang duha ka gagmay’ng pakete nga napalit sa buy-bust.

Nakuha usab ang P800 nga kwarta lakip na ang P400 nga gibayad sa pagpalit sa duha ka gagmay’ng pakete.

Ang suspek gikustodiya na sa kapolisan ug mag-atubang sa kasong kalapasan sa Comprehensive Dangerous Drugs Act o ang Republic Act 9165. (BANAT NEWS)