Dunay mga kalihokan sa IEC nga bukas sa tanan

CEBU, Philippines – Dili tanang mga kalihokan sa International Eucharistic Congress ekslusibo lang alang niadtong mga nagparehistrong mga delegado, kini maoy pagklaro ni Auxiliary Bishop Dennis Villarojo, Secretary General sa IEC 2016.

Matud pa niya bukas ang maong kalihukan dili lamang sa mga nakarehistro apan lakip na usab ngadto sa mga wala narehistro.

Sumala pa ni Villarojo, makahimo pagtambong ang katawhan sa mga kalihukan sa IEC sama sa Enero 24 pagbukas sa IEC diin usa ka Santos nga Misa ang ipahigayon alas kwatro sa hapon  diha sa Plaza Independencia. Mahimo usab motambong sa Enero 27 diin adunay 14 ka mga parokya mopahigayon og parish encounters kauban ang mga delegado ug parokyano sa maong parokya nga magpaambitay sa ilang mga kasinatian human sa Santos nga Misa ug isunod gilayon ang Barrio Fiesta. Sa Enero 28 ipahigayon ang Visita Iglesia sa pito ka mga parokya sa Dakbayan;  Enero 29  usa ka Santos nga Misa ang himuon diha sa Cebu Provincial Capitol ug isunod gilayon ang prosisyon padulong sa Plaza Independencia.

Si Villarojo nipadayag nga gipaabot nila tunga ngadto sa usa ka milyon ka tawo ang gikatakdang mosalmot sa kataposang misa sa Statio Orbis diha sa may South Road Properties (SRP).

Nanawagan karon ang IEC committee sa tanang katawhan nga maghiusa sa pag-ampo aron malinawon ug malampuson ang maong kalihokan.

Samtang gihulagway sa Police Regional Office PRO7 nga dakong hagit kanila ang seguridad sa   delegado sa IEC itandi sa Asia Pacific Economic Cooperation meet nga  gihimo dinhi sa Sugbo sa nakalabay nga tuig. Kini tungod kay buwag-buwag man ang mga venues sa kalihokan nga tambongan og liboan ka mga delegado gikan sa ubang mga nasud ug sa mga rehiyon dinhi sa nasud.

Matud pa ni Senior Superintendent Rey Lyndon Lawas mokuha sila og dugang pwersa gikan sa Bohol ug Siquijor aron motabang kanila sa pagbantay.

Sumala pa ni Lawas, gawas sa IEC gihugtan usab nila pagpangandam sa kapulisan ang nagkaduol nga kalihukan sa Sinulog atol sa pista sa Senior Sto.Niño. – /EIM) (BANAT NEWS)