Gipusil patay sa gikainom atubangan sa kapuyo
CEBU, Philippines – Patay diha-diha ang usa ka construction worker human gipusil atubangan sa iya’ng kapuyo sa Sitio Rattan, Barangay Tanke, Dakbayan sa Talisay niadto’ng Domingo sa hapon Ang biktima mao si Jessie Casio, 45-anyos, taga Sitio Mahayahay, Barangay Cansojong. Samtang ang suspek nailhan nga si Edile Boy Reyes alyas Bogoy, 28-anyos, ulitawo nga nagpuyo sa nahisgutang lugar.
Matud ni SPO1 Mikie Espina, imbestigador sa Talisay City Police Station, nga kuyog ang biktima sa iya’ng kapuyo aron bisitahon ang kaparyentehan sa mao’ng lugar. Asoy ni Espina nga nag-inom og ilimnong makahubog ang biktima uban sa amahan sa iya’ng kapuyo ug sa suspek.
Pagkahurot sa ila’ng giinom, namalhin sa laing imnanan ang duha ug didto nagtiwas og inom.
Sigun pa ni Espina nga base sa alegasyon sa kapuyo sa biktima nga kalit lang nibunot sa iya’ng armas ang suspek dayun pusil makaduha ka higayon tumong sa ulo sa biktima. Nahagba ang biktima samtang nisibat ang suspek.
Dali nga gidala sa Talisay City District Hospital ang biktima apan gideklarar kini nga dead on arrival sa mga mananambal.
"Nikalit lang gyud og bunot kuno ang suspek nga wala man unta daw kuno’y giawayan ang suspek ug ang biktima," matud ni Espina.
Nakarekober og duha ka kabhang sa .45 caliber pistol nga bala ang kapolisan sa crime scene.
Asoy ni Espina nga ila pa’ng palawman ang imbestigasyon sa pagsuta og unsa’y motibo sa pagpusil ug ang pagsikop sa suspek. – /GMR) (BANAT NEWS)
- Latest
