Police visibility ipatuman sa pagsugat sa 2016

CEBU, Philippines – Bisan sa malinawon ug malampuson nga pagsaulog sa Pasko sa Sugbo ug tibuok Central Visayas, ang direktor sa Police Regional Office-7 ang mopatuman pa og hugot nga seguridad atol sa pagsugat sa Bag-ong Tuig.

Matud ni Chief Supt. Manuel Gaerlan nga kuwang pa ang gihimo nga pagbantay sa mga polis atol sa Pasko.

Gusto sa opisyal nga dugang pagpatrolya sa palibot ang ipatuman sa kapolisan ilabi na sa mga lugar nga dunay magpabuto og armas aron kini dali nga marespondehan ug masikop.

Sumala pa ni Gaerlan nga kini angayan nga buhaton aron hingpit nga malikayan ang mahimong biktima sa saag nga bala atol sa pagsugat sa Bag-ong Tuig.

Sa pagsugat sa Pasko adunay duha ka tawo ang natala nga nabuthan og pabuto maong gusto ni Gaerlan nga kung mahimo wala na’y maangol atol sa Bag-ong Tuig.

Dugang foot patrol ug paglibot sa mga patrol cars sa nagkadaiyang dapit sa mga dakbayan ug sa tibuok rehiyon ang buhaton base sa labing ulahi’ng mando sa direktor sa PRO-7.

Samtang ang hepe sa City Intelligence Branch (CIB) sa Cebu City Police Office, Supt. Romeo Santander, nipahibawo nga generally peaceful ang dakbayan sa pagsugat sa Pasko.

Apil na nga nagmalinawon ang gihimo nga Misa de Gallo sa nagkadaiyang simbahan sa siyudad.

Apan gipasabot ni Santander nga niining pagsugat sa Bag-ong Tuig sayo sa gabii sa petsa 31 sa Disyembre ipakatap sa palibot ang mga polis kay niining orasa magsugod na man sab ang pagpabuto sa mga tawo gamit ang firecrackers. Gani gipasabot ni Santander nga nihimo na usab og panagtagbo ang kapolisan aron hisgutan ang preparasyon sa Bag-ong Tuig.

Lakip sa hingusgan sa kapolisan ang pagsikop sa mga ilegal nga pabuto nga gibaligya gawas sa South Road Properties (SRP). Atol sa misa sa mga simbahan karong petsa 31 sa gabii gusto usab ni Santander nga ilakip sa pagpahibawo sa mga manimbahay ang mga insaktong paagi sa pagsaulog sa Bag-ong Tuig aron malikay sa peligro ug malikay sa krimen.

Gipahibawo usab sa hepe sa CIB nga ila gyud badlungon kadtong mga tawo nga maghimo og kalingawan sa karsada aron malikayan ang motumaw nga kagubot ug aron mahimong hapsay ug malinawon ang pagsugat sa tuig 2016. – /GMR) (BANAT NEWS)