Aldub moanhi sa sugbo

CEBU, Philippines - Samtang naghinam-hinam na ang katawhan sa pag-abot sa sikat nga loveteam nga Aldub dinhi mismo sa Siyudad sa Sugbo, ang Cebu City Transportation Office nangandam na usab sa pagpunsisok unya sa AlDub fans nga posibleng makaapektar sa dagan sa trapiko.

Ugmang adlawa gitakda nga mobisita ang mga sikat nga personalidad sa GMA-7 sa misikat nga segment sa ilang noontime variety show sa Eat Bulaga nga silang Maine “Yaya Dub” Mendoza  ug Alden Richards.

Ang loveteam sa duha naporma tungod sa Kalyeserye portion nga “Juan For All, All For Juan” sa Eat Bulaga.

Base sa nakuhang impormasyon sa Banat News alas-5 sa hapon moabot sa SM City Seaside ang magka love team  aron i-promote ang ilang pelikula nga “My Bebe Love” nga entry sa nagsingabot nga Metro Manila Film Festival 2015.

Gibidahan ang maong pelikula nila ni Ai Ai delas Alas ug Vic Sotto kinsa lakip pud sa motikang sa nahisgutan nga mall show. 

Ang AlDub phenomenon nagsugod sa sikat kaayo karong kalyeserye sa noontime show sa GMA-7 nga Eat Bulaga nga nisikat og maayo di lang sa Pilipinas kondili sa ubang bahin sa kalibutan nga adunay mga Filipino.

“We are expecting traffic especially with the presence of GMA entertainment personalities,” matud pa ni Atty. Rey Gealon, ang acting executive director sa CCTO.

Si Gealon masaligon nga makontrolar gihapon nila ang maong sitwasyon sa CCTO tungod kay may giandam na silang dugang traffic enforcers inubanan sa South Road Properties Mobile Team.

Wala ilimod ni Gealon nga posibleng makasinati og “heavy traffic” ang Cebu South Coastal Road.

Tungod niini, si Gealon mipahibalo nang daan sa mga motorista nga way katuyoan sa SRP nga molikay una pag-agi sa dapit ug mangita na lang og alternatibong kaagian aron di sila matanggong sa trapiko.

Siya usab malaumon nga ang management sa maong mall makapahiluna bisan pa man sa kadaghan sa sakyanan aron dili mausab ang grabeng trapiko nga nasinati  diha ang maong mall nangabli sa miaging buwan.

“Hopefully, the mall management can accommodate with dispatch all these vehicles in their parking spaces to avoid repetition of traffic havoc during its opening,” matud ni Gealon.

Gawas sa mall show, ang CCTO nangandam usab tungod kay ang maong network mobisita usab sa usa sa mga barangay sa siyudad alang sa “Juan for All – All for Juan Sugod-Bahay sa Barangay” ug posibleng adunay road closures. (BANAT NEWS)