Bag-ong international port tukoron sa Consolacion

CEBU, Philippines – Ang Cebu Provincial Development Council (PDC) misugyot sa Regional Development Council (RDC) sa pagpatukod og bag-ong Cebu International Port (CIP) pagsulbad sa kahuot diha karon sa port sa Cebu North Reclamation Area.

Niadtong Biyernes ang PDC nga gipangulohan ni Gobernador Hilario Davide, III miduso og resolusyon kabahin sa maong awhag.

Ang PDC nagkanayon nga ang Cebu paspas kaayo ang urbanized ug intensive land-use tungod kay sentro kini sa development sa rehiyon ug Visayas area ug nagkinahanglan na kini og dako ug moderno nga international containerized port facility.

Si Davide nagkanayon nga ang CIP maoy long-term solution sa nagtubo nga ekonomiya sa Sugbo kini base sa feasibility study nga gipahigayon sa Korean Export-Import Bank.

Base sa maong pagtuon, ang volume sa foreign ug domestic cargoes sa Cebu International Port karon misaka gikan sa 21.357 million metric tons sa tuig 2009 ngadto sa 30.534 million metric tons sa tuig 2013.

Nagkadaghan na usab ang mga establisamentong nag-negosyo sa Cebu North Reclamation Area ug nagkahuot na usab ang dagan sa trapiko.

Base usab sa pagtuon ang 12 ektaryang luna sa Barangay Tayud, lungsod sa Consolacion maoy haom kaayo nga butangan  sa bag-ong CIP.

Ang construction sa maong proyekto gikatakdang magsugod sa buwan sa Agosto, 2016  ngadto sa ikaduhang quarter sa tuig 2019 nga gastohan og P9.3 bilyones.

Ang general manager sa Cebu Port Authority (CPA) nga si Edmund Tan nanghinaot nga maka-avail sila og ubos nga interest nga loan gikan sa Korean government alang sa pundo sa nahisgutang proyekto.

Matud ni Tan nga ang CPA duna lang income nga P1.2 bilyones matag tuig ug dili kini paigo sa pagpatuman sa proyekto.

Gibutyag ni Tan nga ang lokal nga kagamhanan sa lungsod sa Consolacion mipasalig sa ilang suporta sa proyekto. Ang CPA ubos na kini karon sa close coordination sa Department of Public Works and Highways alang sa access road nga gikinahanglan sa bag-ong port  nga magkonektar  gikan ug paingon diha sa Cebu North coastal road.

Si Tan mibutyag nga ang feasibility study sa bag-ong CIP gisumitir na ngadto sa Department of Transportation and Communication ug sa National Economic Development Authority isip rekisitos sa construction sa proyekto. – /EIM) (BANAT NEWS)