Nangataktak tungod sa isyu sa CICC niapelar sa desisyon

CEBU, Philippines – Si provincial legal officer, Atty. Orvi Ortega nasubo sa pagkataktak gikan sa serbisyo ni assistant provincial legal officer, Atty. Marino Martinquilla tungod sa giingong kalambigitan niini sa pagpaburot sa presyo sa pagtukod sa Cebu International Convention Center (CICC).

Si Ortega miklaro bakante pa gihapon ang pwesto ni Martinquilla tungod kay dili pa pinal ang maong desisyon sa Ombudsman.

Ang mga gipangtaktak miapelar  na sa Court of Appeals ug nanghinaot siya nga ang desisyon sa CA mopabor kang Martinquilla ug sa iyang mga kauban.

Sayo pa, ang Ombudsman mimando sa pagpataktak gikan sa serbisyo sa mga kanhi opisyal sa Kapitolyo lakip na niini si Martinquilla tungod sa kalambigitan sa pagpaburot sa construction sa Cebu International Convention Center (CICC).

Si Ombudsman Conchita Carpio-Morales miaproba sa desisyon ni Dennis Mendoza, graft investigation and prosecution officer kinsa nagkanayon nga ang nahisgutang mga opisyal wala motuman sa proseso sa pag-bidding nga usa sa mga rekisitos sa pagtukod og pasilidad nga iya sa gobiyerno.

Lakip sa gipataktak si kanhi provincial administrator, Eduardo Habin; kanhi general service officer, Bernard Calderon; kanhi health officer, Cristina Giango; kanhi provincial planning and development officer, Adolfo Quiroga; kanhi provincial agriculturist, Necias Vicoy Jr.; kanhi provincial treasurer, Roy Salubre; kanhi budget officer, Emmy Gingoyon; kanhi assistant provincial engineer, Eulogio Pelayre; ug Martinquilla kinsa maoy kanhi legal officer.

Si Habin maoy chairman kaniadto sa bids and awards committee (BAC) samtang si Martinquilla maoy vice chairman ug ang ubang opisyal mga miyembro kini kaniadto sa BAC.

Nasuta nga ang nahisgutang mga opisyal liable sa “grave misconduct and gross neglect of duty”.

Ang maong mga opisyal dili na usab tugotan nga makatrabaho sa gobiyerno ug i-forfeit ang ilang mga retirement benefit.

Apan ang kadtong wala na magtrabaho sa gobiyerno, ang Ombudsman mimando og alternative penalty diin pabayaron sila sa ilang usa ka tuig nga sweldo ngadto sa anti-graft office diin ikaltas kini sa ilang retirement benefits, leave credits ug uban pa nilang receivables.

Samtang si kanhi gobernador Gwendolyn Garcia wala malakip sa administrative liability tungod kay napili kini pag-usab niadtong eleksiyon sa 2007 ug 2010 ug subay sa Aguinaldo Doctrine wala nay bili pa ang kasong administratiba tungod pagkapili kaniya pag-usab sa pwesto gipasaylo na kini sa katawhan. – /EIM) (BANAT NEWS)