Kalinaw maoy awhag sa simbahan sa mga politico

CEBU, Philippines – Kadagkuan sa Simbahan sa Sugbo nanawagan sa mga politiko ug sa ilang mga dumadapig nga ipatigbabaw ang kalinaw niining nagsingabot nga eleksyon.

Kini tungod sa duguong panghitabo didto sa lungsod sa Dumanjug nga giingong may bulok politika nga nisangpot sa pagkakalas sa kinabuhi.

Nanghinaot si Auxiliary Bishop Dennis Villarojo magpabilin ang kalinaw sa maong lungsod pinaagi sa pagtambayayongay sa katawhan alang sa kaayohan sa ilang lungsod.

Si Archbishop Jose Palma sa iyang bahin nibutyag nga kung aduna na gani mga bayolente nga binuhatan nga moresulta sa dugoon nga hitabo panahon sa election dili na kini maayo og makatarunganon.

"Anything that involves violence in politics, anything that harms people or anything that involves any kind of violence and destruction para nako usa ka sign nga ang atong politiko kinahanglan mopakita sa kaayohan," matud pang Palma.

Sumala pa sa arsobispo mas maayo buhaton sa mga kandidato mao ang pagyagyag sa ilang mga programa alang sa kaayohan sa katawhan ug respetohon ang boto sa mga tawo.

Gibutyag sa Arsobispo nga kung adunay rekomendasyon sa board nga kinahanglan siyang mopaguwa og pastoral letter iyaha kining buhaton.

Kahinumduman nga adunay pagpamanhig nga nahitabo sa Barangay Masa sa Lungsod sa Dumanjug sa dihang nakabiya na si Vice Mayor Efren Gica sa pulong-pulong sa mga proyekto nga gigastohan sa kagamhanan sa maong barangay.

Nasundan kini og duguong hitabo human sa gihimong followup operation sa kapolisan nga miresulta sa kamatayon sa duha ka tawo diha gihapon sa maong lungsod.  – /EIM) (BANAT NEWS)