P400 mil nga monstrance sa IEC gipakita

CEBU, Philippines - Usa ka unique nga monstrance nga adunay gitas- on nga upat ka tiil ang gamiton sa International Eucharistic Congress nga ipahigayon dinhi sa Dakbayan sa Sugbo sa sunod tuig.

Matud pa ni Msgr. Marnell Mejia, chairman sa Committee on Procession nga espesyal gayud nga pagdesinyo sa monstrance nga gamiton atol sa ipahigayon nga prosesyon gikan sa Cebu Provincial Capitol padulong sa Plaza Independencia.

Sumala pa ni Mejia, panagtambayayongay niya ug sa artist ang konsepto sa maong monstrance nga dunay base nga tripod form nga nagpakita sa tulo ka dagkong isla nga porma og krus nga nagsimbolo sa pagtuo.

Ang maong monstrance dunay 51 ka bidlisiw sa adlaw nga nagsimbolo sa 51st International Eucharistic Congress ug adunay upat ka mga cardinal needle directions nga diin nagpakita sa pagka misyonaryo ug pagka kristiyano.

Gitug-an usab ni Mejia nga gibutangan usab kini og desinyo nga dahon sa kamungay nga nagsimbolo usab sa gihigop nga sabaw ni Santo Papa Francisco atol sa labing una niyang Papal Visit dinhi.

Aduna usab siyay lima ka perlas nga nagsimbolo sa Pilipinas nga giisip sa kasaysayan nga “Perlas nang Silanganan” nga gidesinyohan usab og lima ka buwak sa Sampaguita pagpakita sa lima ka siglo nga pagka-Kristiyano sa Pilipinas.

Ang maong monstrance dunay 8 ka pulgadas nga diyametro nga maoy sudlan sa Balaang Hostiya nga maoy i-prosesyon atol sa kalihukan sa EIC.

Si Mejia nitug-an nga ang maong monstrance hinatag gikan sa duha ka mga tawo nga naa karon nakabase na sa kaulohan ug gihimo kini gamit ang metal nga ginama ni Jessie Pingol.

Gipadayag ni Mejia nga kung paliton ang maong monstrance dili mominos magkantidad kini og P400 mil apan kini gihatag sa Sugbo pinaagi sa mga higala ni Fr. Marvin Mejia.

Ang monstrance bendisyonan karong adlaw nga Domingo sa pagbukas sa “Jubilee Door” diha sa Cebu Metropolitan Cathedral. (Rowena Capistrano/EIM)(BANAT NEWS)