Gipatay kay namasangil sa usa ka asawa nga drug user

CEBU, Philippines – Nalapsan sa bala ang dughan sa usa ka lalaki human siya gipusil sa bana sa babaye’ng iyang gipasanginlan nga tiggamitan og gidili nga drugas.

Didto kini mahitabo sa Gochan Delco Warehouse sa Barangay Quiot, dakbayan sa Sugbo pasado alas 7 kagahapon sa buntag.

Ang namatay mao si Richard Gallo, 41, minyo, truck drayber sa Delco Trucking nga taga Sitio Lower Suran, samtang ang gitumbok nga mipusil kaniya mao si Victoriano Serencio, 45, minyo ug nagpuyo sa maong dapit.

Matud pa ni SPO3 Filomeno Mendaros, imbestigador sa homicide section sa Cebu City Police Office nga unang gikomprontasi sa suspetsado ang biktima kabahin sa mga giestorya niini sa mga tawo nga manggamitay og drugas ang iyang asawa.

Atol sa panag-atubang sa duha nahitabo ang tinubagay ug misangpot sa sinukmagay. Sumala pa ni Mendaros atol sa ilang sinukmagay nalupig ang suspetsado hinungdan nga mibunot kini sa iyang giluklok nga armas.

Sa dihang nakakita ang biktima nga duna’y armas ang suspetsado, misulay kini pagkaratil og dagan apan nadagma. Didto na gipusil ni Serencio ang biktima ug ang bala milapos sa iyang dughan.

Abtik kaayo nga misibat si Serencio. Gituohan nga revolver ang armas nga gigamit kay walay narekober nga basiyo sa bala ang kapolisan. – /RUB) (BANAT NEWS)