Core values itudlo sa taga district hospitals
CEBU, Philippines - Gikatakda’ng ipaubos sa core values seminar ang mga kawani sa mga hospital sa probinsiya human sa sunod-sunod nga kontrobersiya.
Si Bobby Nacorda, human resource management officer IV sa Kapitolyo, nagkanayon nga padayon ang ila’ng pagpatuman sa “service with a heart” program sa mga kawani sa probinsiya.
Matud ni Nacorda nga motabang sila sa Provincial Health Office (PHO) sa pagtubag sa mga problema nga naglambigit sa mga kawani sa tambalanan.
Kapin na sa 1,000 ka kawani sa Kapitolyo ang napaubos sa mao’ng core values seminar.
Gipasabot ni Nacorda nga tumong sa probinsiya nga mausab ang kinaiya sa mga kawani sa pagtagad o pag-atiman sa mga kliyente.
Ipasabot ngadto sa mga kawani ang kabahin sa paghatag og matinud-anon nga serbisyo sa publiko.
Matud ni Nacorda nga “emotional learning” ang ila’ng itudlo sa mga kawani aron dili gyud nila makalimtan.
Ang mga kawani sa Kapitolyo lakip sa mga tambalanan tudloan sa unsaon sa pag-abi-abi sa mga moduol sa ila’ng buhatan diin kinahanglan nga adunay pahiyom sa ila’ng mga nawong aron mapabatyag ngadto sa mangayo og tabang nga andam sila nga mohatag sa serbisyo isip mga kawani sa gobiyerno. (Brenda D. Batuto/GMR)(BANAT NEWS)
- Latest