Nag-date kauban uyab gipusil sa tulisan

CEBU, Philippines – Nalandig sa tambalanan ang usa ka lalaki human kini gipusil ug natapsingan sa ulo sa duha ka armadong tulisan nga mitulis kaniya ug sa iyang uyab samtang sila nanuroy diha sa Roro Port sa sitio Camolinas, barangay Poblacion, lungsod sa Cordova sa miaging gabii.

Si  Police Officer 2 Ryan Casiban sa Cordova Police Station miila sa biktima nga mao si Jeff Navarro Laroa, 37, taga barangay Basbas, dakbayan sa Lapu-Lapu kuyog ang hinigugma nga si Alona Lato, 22, taga Ibabao, Basak sa mao gihapong dakbayan.

Matud pa ni Casiban, nag-estorya  ang duha sa maong lugar dihang kalit lang nga mitumaw ang duha ka wala mailhing mga lalaki ug kalit lang nition kanila og armas dungan ang pagdeklarar nga tulis.

Gipangayo sa tulisan ang yawe sa motorsiklo nga giparking duol sa ilang gilingkoran apan dihang nagmagahi kini paghatag niini kalit kining gipusil diha sa ulo ug suwerte nga nakatakilid og gamay ang biktima ug natapsingan lang sa bala.

Gikuha sa tulisan ang yawe sa motorsiklo didto kang Laroa ug gikuha usab niini ang cellphone sa hinigugma niini dayong pabulhot sa pagpadagan pahilayo sa maong dapit.

Ang biktima gidala sa Vicente Sotto Memorial Medical Center sa dakbayan sa Sugbo samtang wala pa mailhi sa kapolisan kun si kinsa ang mga karnaper. (BANAT NEWS)