Mga police trainees tugotan ra nga makagradwar

CEBU, Philippines – Maka-graduate ra g’yud kadtong 192 ka polis nga wa papasoha niadtong Biyernes sa buntag tungod sa pagpalta nila sa pagtambong sa Honor’s Night niadtong Huwebes.

Usa sa maong mga polis mitug-an gipatawag sila sa Regional Training School-7 sa Barangay Jugan, Consolacion kagahapon sa buntag ug sila gimaymayan ni Superintendent Edwelito Rosales.

Giangkon sa mga police trainee nga nakahimo sila og sayop nga wala mosalmot sa mao nga kalihukan apan nangatarungan nga dili ‘sab makiangayon nga hatagan sila og bug-at nga silot.

Matud sa police trainee nga gipasaligan sila ni Rosales nga makagradwar ra gyud sila bisan pa sa nahitabo ug himoan na lang sila og bag-ong order aron malakip sila sa unang naka-graduate

Matud pa sa police trainee nga medyo naibtan na siya og tunok ug makatulog na gyud siya og tarong tungod sa pasalig ni Rosales ngadto kanilang tanan.

Ug subay niini gipadagan sila kagahapon isip kabahin sa Graduation Run nila bisan nga naka-dagan na sila sa miaging semana og 15 ka kilomeros.

Sumala pa niya nga midagan sila’g 25 rounds sa oval apan bisan pa man nga kapoy nalipay siya kay gipasaligan nila nga mo-graduate.

Apan si Supt. Rosales miingon sa iyang text message sa Banat News nga hangtud kagahapon wa pa lang gihapon mahuman ang evaluation sa Academic Board sa RTS7. (BANAT NEWS)