Taxi nabinlan og butang, driver gidakop

CEBU, Philippines – Napriso ang usa ka taxi driver human nasakpan nga nangilkil sa iya’ng pasahero bugti sa paghatud sa bag nga nabiyaan niadto’ng nakalabay nga kahaponon.

Si Carlos Capuyan, 44, lumad nga taga Sac-on, lungsod sa Carmen ang gidakop atol sa entrapment operation human nangayo og tabang sa kapolisan ang biktima nga si Maria Rhodessa Aballe, 31, taga Ubos Puso, Basak, dakbayan sa Sugbo.

Base sa imbestigasyon sa kapolisan, si Aballe nisakay sa E-Taxi nga gimaneho ni Capuyan gikan sa F. Cabahug Street sa Mabolo paingon sa usa ka hotel sa F. Ramos Street.

Nakanaug na si Aballe diha’ng nabantayan nga nahabilin ang iya’ng sling bag sulod sa taxi.

Ang sulod sa sling bag naglakip sa passport sa iya’ng uyab, mga credit cards, charger sa iPhone, driver’s license ug yawe sa sakyanan.

Tungod kay ang impormasyon sa taxi natala sa security guard sa hotel, na-contact ni Aballe si Capuyan pinaagi sa Land Transportation Franchising and Regulatory Board.

Apan matud sa biktima nga si Capuyan nidemanda og P2 mil una niya ihatag pagbalik ang mga kabtangan ni Aballe.

Tungod niini, si Aballe nitawag sa Fuente Police Station ug gihimo ang entrapment operation.

Si Capuyan nibalik sa lugar aron ihatud sa biktima ang nabiyaan nga gamit apan sa pagdawat niini sa P2 mil gikan kang Aballe, dali kini nga gidakop sa kapolisan.

Ang mga gamit ni Aballe nakuha ra usab niya nga naa nahimutang sa passenger seat sa taxi cab.

Si Capuyan gidala sa Fuente Police Station ug mapasakaan og kaso nga estafa ug coercion. - /GMR) (BANAT NEWS)