Unom ka brgy kapitan mitapon sa Team Rama

CEBU, Philippines - Nadugangan ang pwersa sa Team Rama human nitapon kanila ang unom nga kapitan sa South District sa dakbayan sa Sugbo sugod kagahapon.

Matud pa lima ka kapitan nga sakop sa Bando Osmeña Pundok Kauswagan (BOPK) ug ang kapitan sa Babag nga independente kaniadto ang nitapon sa Team Rama.

Ang mga kapitan nga nitapon sa Team Rama mao sila Henry Eran sa Barangay Cogon Pardo, Rodrigo Jabellana sa Bulacao, Winefredo Macario sa Sudlon II, Cesar Dolorito sa Babag, Lucrecia Gabato ug Alexander Ibarrita sa Barangay Bonbon.

Matud ni Barangay Tinago Kapitan Joel Garganera ug Vice President sa Association of Barangay Council nga ang gibuhat sa maong mga kapitan usa ka matang sa pagprotesta batok sa konseho.

Kini tungod kay wala sila makauyon sa gibuhat sa mga konsehal  pagbabag sa pagbaligya sa luna sa South Road Properties (SRP).

Dugang pa ni Garganera nga dili lang ang proyekto sa siyudad ang naapektuhan niini  kondili silang mga barangay duol sa SRP.

Si Kapitan Eran sa iyang bahin miingon nga patas ug dili mamolitika si Mayor Michael Rama sa mga barangay bisan dili kaalyado nga usa sa rason sa iyang pagtapon. (BANAT NEWS)