Cortes nihatag sa katapusang SOCA
CEBU, Philippines - Nipadangat na sa iya’ng katapusang State of the City Address si Mandaue City Mayor Jonas Cortes kagahapon.
Kini nahimo’ng kabahin sa kalihukan sa ika-46 nga Charter Day sa dakbayan. Gitambungan ang SOCA ni Cortes sa mga magpapatigayun, mga barangay opisyal ug mga molupyo sa dakbayan nga gipahigayun sa Mandaue City Sports and Cultural Complex.
Iya’ng gihisgutan ang mga programa ug proyekto nga napatuman sulod sa walo na niya ka tuig nga pagpangatungdanan isip mayor sa dakbayan nga naglakip sa housing program sa 6.5 ka ektaryang luna sa Paknaan.
Lakip sa gihisgutan ang Performance Governance System nga gisubay sa pagpadagan sa pangagamhanan.
Gitataw usab niya nga ang dakbayan maoy nagsilbi’ng tinubdan sa mga dekalidad nga produkto nga ikapasigarbo sa katawhang Mandauehanon.
Si Cortes dili na makapasubli sa pagka-mayor sa 2016 ug gihugonhugonan nga si Kongresista Gabriel Luis Quisumbing nga iya’ng kaalyado ang mopuli kaniya.
Kung madayun, si Quisumbing makig-atbang kang Konsehal Emmarie “Lollipop” Ouano –Dizon kinsa nagtinguha usab nga mag-mayor sa 2016 samtang si Cortes ikaatbang usab sa amahan ni Dizon nga si Bokal Thadeo Ouano sa pagka-kongresista. (BANAT NEWS)
- Latest