Naghikog kay anak napriso tungod sa drugas

CEBU, Philippines – Gumikan sa kaguol nga nadakpan ug napriso iyang anak tungod sa ilegal nga drugas, usa ka amahan ang naghikog patay sulod sa ilang balay diha sa Sitio Sto. Niño, Brgy. Inayawan sa dakbayan sa Sugbo kagahapon sa buntag.

Ang naghikog mao si Zosimo Mandawe, 58, nagpuyo sa maong lugar.

Sa imbestigasyon nga gihimo sa Homicide Section sa Cebu City Police nila ni Police Officer 1 Reoful Adalim, kini mitug-an nga naguol si Mandawe nga napriso ug nadakpan ang iyang anak gumikan sa kaso sa drugas.

Matud pa, gigamit ni Mandawe ang duyan nga nagbitay sa sagunting sa balay ug gihikot kini sa iyang liog sa iyang paghikog ug naabtan sa asawa niini nga wala nay kinabuhi.

Ang mga sakop sa Cebu City Emergency Medical Services (CCEMS) misuway pagluwas ni Mandawe apan patay na g’yud kini.

Matud pa ni Adalim, ang asawa ni Mandawe mitug-an nga naghubog og maayo ang iyang bana sa wala pa niya kini makit-ing patay. – /EIM) (BANAT NEWS)