Cebu City, Lapu-Lapu City nag-una sa rabies
CEBU, Philippines – Nag-una gihapon ang dakbayan sa Lapu-Lapu ug Cebu City sa dunay labing daghang kaso sa rabies sa tibuok probinsya sa Sugbo sumala pa ni Mary Rose Vincoy, pangulo sa Provincial Veterinary Office (PVO) sa lalawigan.
“Great contributor sa entire province g’yud ang Cebu City and Lapu-Lapu City because they account 80 percent of the total cases,” matud pa niya.
Sa tuig 2013, dunay 42 ka mga kaso sa canine rabies (pinaakan sa iro) sa tibuok lalawigan. Ang 31 niini gikan sa Cebu, Lapu-Lapu ug Mandaue Cities.
Sa tuig 2014, mas gamay lang ang natalang mga kaso sa PVO nga miabot lang og 39 ka mga kaso, apan ang 18 niini gikan sa Lapu-Lapu City, 16 sa Cebu City, tagduha sa Talisay City ug Balamban samtang tagsa sa Mandaue City ug San Remigio.
Miubos usab ang gidaghanon sa “human rabies” gikan sa pito niadtong 2008 nahimo nalang kining tulo niadtong 2013. Tagsa ka mga kaso ang natala niini sa mga siyudad sa Toledo, Bogo, ug Naga.
“We have one last year but suspected ra man to. But bisan one case ra sa human rabies, we already consider it as outbreak and serious case,” dugang pasabot ni Vincoy.
Si Vincoy miingon nga kinahanglan pang hingusgan ang kampanya sa pagpamakuna batok sa rabies sa nahisgutang mga dapit nga dunay daghang kaso.
Ang rabies usa ka matang sa sakit nga zoonotic nga mutakboy gikan sa mananap nga natakboyan niini ngadto sa tawo.
Sumala pa sa World Health Organization, ang incubation period sa rabies molanat og duha ngadto sa tulo ka buwan, apan duna say uban nga lima lang ka adlaw mogawas dayon kini ug dunay sa mga kaso nga molanat pa og katuigan una pa mogawas gikan napaakan.
Isip pagtimaan sa Rabies Awareness Month karong bulana gihingusgan karon ang libreng pagpamakuna nga gilusad sa local government units ug pribadong sektor.
Usa sa mga nanghatag og libreng bakuna mao ang Bill and Melinda Gates Foundation ug ang World Health Organization’s Rabies-Free Visayas Project. (Gikan sa The Freeman/EIM)
- Latest
