Siyam ka Nigerian scholars gipapauli kay badlungon
CEBU, Philippines – Siyam ka mga estudyanteng Nigerians nga iskolar sa ilang nasud ang gipapauli balik sa ilang lugar niadtong Sabado tungod sa pagpabadlong.
Ang siyam ka Nigerians nagkuha og maritime courses ug sila mga scholars sa University of Cebu – Maritime Education and Training Center (UC - METC) nga anaa mahimutang subay sa SRP Mambaling Road, Cebu City. Si UC legal consultant Atty. Hans Abella nagkanayon nga aduna silay hapit sa 300 ka Nigerian scholars sa maong institusyon.
Sila nagpuyo sa dormitoryo sa maong tunghaan ug gastos kini sa ilang gobiyerno.
Giklaro ni Abella nga ang siyam ka estudyante gipapauli balik sa ilang nasud tungod kay nakalapas sila sa mga polisiya sa maong tunghaan.
“It was an order from the Nigerian government to recall them since they violated some of the school’s policies,” matud pa niya. Mga representante sa Nigerian Maritime Administration and Safety Agency (NIMASA) ang mihikay sa pagpauli sa maong mga tinun-an.
“They will be the one to extend discipline to the students. Gusto nila nga matarong atong mga estudyante,” pagklaro pa ni Abella.
Ang mga kalapasan sa mga estudyante naglakip sa wala pagsunod sa curfew, diin ang maong mga estudyante nagpuyo sa dormitoryo sulod sa UC – Mambaling Campus. Samtang dunay uban kanila ang anha na mabuntagan sa gawas ug kusog kaayong manukol sa mga opisyal sa eskuylahan.
"Ang amo lang, naghatag mi og report sa Nigerian government. Ang NIMASA ang naghatag sa mando sa pagpa-uli sa siyam ka estudyante,” dugang pasabot ni Abella. Ang maritime courses usa ka karera nga nagkinahanglan og estriktong pagpatuman sa disiplina nga may pagkaparehas sa disiplina sa militar.
“Importante sa mga maritime students ang disiplina samtang nagtungha pa sila labi na kun makatrabaho na sila, ang sa side sa NIMASA kay, this is more of a privilege than right," matud ni Abella. – /EIM) (BANAT NEWS)
- Latest
