P10mil Christmas bonus giduso ni Rama sa Konseho

CEBU, Philippines – Ang Executive Department sa dakbayan sa Sugbo miduso sa konseho og P10 mil alang sa Christmas bonus alang sa mga trabahante sa city hall.

Giduso na ni Mayor Michael Rama ang P55 milyones pinaagi sa Supplemental Budget-3 karong tuiga alang sa dul-an lima ka libo nga empleyado sa siyudad sa Sugbo. Lakip sa SB-3 ang terminal leave benefits nga nagkantidad og P3 milyones alang sa onse ka mga trabahante sa nagkalain-laing departamento. Ang budget giingong kuhaon sa General Fund Proper ug Special accounts. Usa niini ang  realignment gikan sa 2014 current appropriations.

Tukion sa Konseho ang maong budget sa regular session karong adlawa. Matud ni City Treasurer Diwa Cuevas nga gisumiter sa Local Finance Committee ang maong proposal niadtong Lunes tungod aduna na lay duha ka session ang Konseho karong buwana. Dugang ni Cuevas nga magmalaumon sila nga maaprubahan ang budget aron sa paghatag og kalipay sa mga empleyado.

Ang maong Christmas bonus lahi sa 13th month pay nga nadawat na sa mga empleyado. – /EIM) (BANAT NEWS)