Mga Osmeña mitambong sa marker ni Don Sergio, Mayor Rama wala

CEBU, Philippines – Wala motambong sila si Mayor Michael Rama ug kanhi Mayor Tomas Osmeña sa gipahigayong kalihukan sa pagsaulog sa ika-136th nga anibersaryo sa adlaw’ng natawhan ni Don Sergio Osmeña Sr. kagahapon sa buntag nga gipasiugdahan sa kagamhanan  sa siyudad.

Ang kanhi mayor giingong didto mitambong sa gipahigayong paghalad sa lukong sa buwak sa monumento ni Don Sergio Osmeña diha sa Camp Sergio Osmeña kun Police Regional Office (PRO)-7 tungod kay mao man kini ang pinasidunggang dinapit.

Hinuon ang kapikas ni Osmeña nga si Konsehal Margot Osmeña uban sa mga sakop sa pamilyang Osmeña ang mitambong sa gipahigayong kalihukan sa kagamhanan sa siyudad diha sa eskina sa Osmeña Blvd. ug dalan Lapu-Lapu diin gibutang ang marker, sa maong dapit nahimutang ang kanhi panimalay sa mga Osmeña diin gipanganak si Sergio.

Diha usab ang bugtong buhi nga anak ni Don Sergio nga si Rosalina Osmeña Valencia nga nag-wheelchair ug mga apo ni Don Sergio nga sila si Toledo City Mayor John Henry Osmeña, Ma. Victoria, Annabel, Margarita nga nagdala na og lain-laing apelyedo.

Lakip sa mga konsehal nga mitambong kagahapon mao sila si Konsehal Sisinio Andales ug Eugenio Gabuya inubanan sa mga opisyal sa kapolisan sa probinsiya, mga department heads ug kawani sa city hall.

Ang nahisgutang kalihokan gibuksan kini sa usa ka Santos nga Misa ug gisunod ang paghalad og mga buwak diha sa monumento ni Don Sergio Osmeña sa may dalan Osmeña Boulevard diin mahimutang ang kanhi nila balay.

Ang apo ni Don Sergio nga si Antonio Osmeña  mibutyag nga sunod tuig tukoron na nila ang giplanong foundation sa ilang pamilya nga ang tumong mao ang paghulma sa umaabot nga mga lider. Nahimong gobernador, kongresista, piskal , bise presidente ug natudlong presidente sa nasud puli kang kanhi presidente Manuel L. Quezon tunga-tunga sa Ikaduhang Kalibutanong Gubat. -/EIM) (BANAT NEWS)