Drug den gironda sa NBI, onse ka tawo nadakpan

CEBU, Philippines - Onse ka mga tawo ang gidakop sa mga sakop sa National Bureau of Investigation (NBI)-7 nga giingong tigpayuhot ug tiggamitan og ginadiling drugas sa Barangay Humay-Humay, dakbayan sa Lapu-Lapu atol sa ilang gihimong buy-bust operation kagahapon.

Matud sa NBI-7 nga nakadawat sila og mga reklamo gikan sa usa ka concerned citizen may labot sa naghitak nga pagpamaligya og ginadiling drugas sa dapit hinungdan nga ilaha kining gipaubos sa surveillance sud sa duha ka semana.

Ang operasyon gisugdan alas-4 sa kaadlawon kagahapon ug nahuman alas- 8 na sa buntag apan napakyas ang mga operatiba sa pagdakop sa subject sa buy-bust nga naila sa pangan nga Jun Hera alyas "Boy."

Apan nasikop sa NBI-7 ang giingong bata-bata niini nga si Zenilyn Taping, 36, ug mga kauban nga sila si Arthur Cartagena, Aldrin Clavero, Edwin Gonzales Jr., Alberto Ramirez Jr., Virgilio Bautista Jr., Zoren Munez, Rene Amoro, Edgardo Colina, Jeremy Cerenio ug Rodel Tampus , pulos molupyo sa maong barangay.

Nakuha sa NBI ang mga gagmay'ng pakete sa gituohang shabu, mga drug paraphernalia, kwarta, ug mga personal nga gamit sa mga dinakpan.

Gihulagway sa NBI-7 nga anaa lang sa street level si Hera nga giingong maka-dispose og singko gramos matag semana ug gihimo niya nga drug den ang ilang balay.

Apan ang mga dinakpan kusganong nanghimakak nga nalambigit sila sa pagpamaligya ug paggamit og ilegal nga drugas sa ilang lugar.

Sigon pa ni Zenilyn Taping kinsa matud pa bata-bata ni Hera, diha ra siya sa ilang balay atol sa pagronda sa NBI-7 ug natulog apan nakurat na lang siya gumikan kay apil siya sa gidakop nga wa man siyay sala nga nahimo.

Gihimakak usab niya nga kaila si Hera. Si Taping miingon nga aduna siyay tarong trabaho, caddy sa golf course.  Samtang si Virgilio Bautista nga usa ka drayber sa habal-habal sa iyang bahin wa makapugong sa iyang kasagmuyo batok sa NBI-7 tungod kay siya pa ang mitabang sa mga operatiba apan giapil hinoon siya sa gidakop.

Nagtingkagol na karon sa prisohan ang mga dinakpan ug gipaabot nga pasakaan sila og kasong pagpamaligya ug paggamit og ginadiling drugas. (BANAT NEWS)