Mga tunghaan patilawon sa bayad sa MCIAA
CEBU, Philippines - Makatilaw ang mga tunghaan sa dakbayan sa Lapu-Lapu sa P88 milyones nga pasiunang bayad sa Mactan Cebu International Airport Authority.
Gibutyag ni Mayor Paz Radaza nga bahin sa maong kantidad ang gamiton sa pagpatukod og dugang lawak saringan.
Matud ni Radaza nga adunay 500 ka lawak saringan ang kulang sa mga tunghaan sa siyudad ug plano niya nga bisan 250 lang ang masugdan og tukod karong tuiga.
Sa pagkakaron ang mga pangpubliko tunghaan sa dakbayan adunay duha ka sesyon matag adlaw diin matag classroom adunay 50 ngadto sa 60 ka mga tinun-an.
Gumikan sa kakulangan sa lawak saringan, ang ubang tinun-an anaa una gipahimutang sa mga covered court o gym ug ang uban sa mga landong nga dapit sama sa punoan sa kahoy ug uban pa.
Gipasabot ni Radaza nga dunay P100 milyones ang gigahin sa siyudad alang sa Special Education Fund ug madugangan kini gikan sa P88 milyones nga gibayad sa MCIAA.
Nanghinaut si Radaza nga aduna pay sunod nga ibayad ang MCIAA ngadto sa siyudad aron masulbad ang ubang mga panginahanglan sa dakbayan sa Lapu-Lapu. (/GMR)(BANAT NEWS)
- Latest