Fake money sa internetan ra giprinta

CEBU, Philippines - Gitumbok nga tighimo og mga peke nga kwarta nadakpan sa mga sakop sa Regional Intelligence Division sa Police Regional Office 7 sa Barangay Day-as sa dakbayan sa Sugbo.

Giila ang dinakpan nga si Nicolas Dela Cruz Herrera, alyas Sonny Opaw, 54, nagpuyo sa 688 D. Jakosalem Street, Barangay Kamagayan ning dakbayan.

Matud pa ni Superintendent Rex Derilo nga dunay nakaabot kanila nga impormasyon may kalabot sa pagpanghimo ni Herrera og mga mini nga kwarta hinungdan nga ilaha kining gipanid-an ug dihang nagpositibo gilusad dayon ang buy-bust operation.

Sumala pa nga napalitan ang suspek sa usa ka poseur buyer og usa ka libo nga pekeng kwarta hinungdan nga kini gidakop. Nakuha sa kapulisan ang unom ka peke nga 500 pesos, tulo ka 200 pesos, unom ka tag 100 pesos. Gawas pa niana duna pay mga peke nga unom ka 1000 peso bills, 18 ka 500 peso bills , 81 ka 100 peso bills nga pulos wala pa maputol-putol.

Matud pa ni Derilo nga bond paper ang gigamit sa dinakpan aron makahimo og peke nga salapi, nga iyang ibaligya og tag 50 pesos ang 500 peso bill, 100 pesos sa 1000 bill, 20 pesos sa 100 bill ug 40 pesos sa 200 bill.

Samtang gipasabot sa dinakpan nga duna’y nagsugo niya nga mohimo og peke nga kuwarta ug paliton lang sab kini sa iyaha ug bisan asa lang sab daw nga internetan kini magpa- print sa iyang mahimo nga peke nga kuwarta.

“Sayon ra man kaayo na, magpa-print ra ‘ko sa internetan, kung magduda na sila sa lain na man pud ko nga internetan magpa-print,” matud pa ni Herrera.

Gikasagmuyo sab sa dinakpan kung nganong siya lang daw ang gidakop nga naa man siya’y mga kauban. Nagduda si Herrera nga dunay nasuya kaniya nga tighimo ‘sab og peke nga kwarta nga igsuon og polis nga gusto nga masolo ang maong negosyo.

Apan gipasabot ni Derilo nga usa ka buy-bust operation ang ilang gihimo ug ang nakuhaan lang sa maong peke nga kwarta sa iyang posesyon ang angay dalhon sa kapulisan.  Katungod usab ni Herrera ang mopasangil nga dunay nagpaluyo sa ilang operasyon.

Gitanggong na karon sa detention cell sa PRO 7 ang dinakpan ug mag-atubang og kalapasan sa Art. 168 sa Revised Penal Code, Possession of Counterfeit Money. (BANAT NEWS)