Na-heat stroke namatay, bfar7 ug denr7 may pahimangno

CEBU, Philippines - Patay na nga nadiskubrehan sa sulod sa pansayan ang usa ka tawo nga gituohang na-heat stroke nga mugna sa grabeng kainit sa panahon sa Sitio Telecom, Barangay Casuntingan, dakbayan sa Mandaue alas-5 pasado ang takna kagahapon sa buntag.

Si SPO4 Fernando Gabutero sa kapolisan sa Presinto 4 sa Mandaue City Police Office (MCPO) miila sa namatay nga mao si Allen Caligner, 49,  taga Cabancalan City, Negros Oriental ug kasamtangan nga nagpuyo sa maong dapit. Ang silingan niini nga si Jenny Navarro, maoy nakadiskubre ni Caligner  nga nagbuy-od sa sulod sa pansayan maong mitawag sila sa kapolisan.

Matud pa ni Gabutero wa silay nakitang samad sa lawas ni Caligner nga madudahang adunay foul play sa kamatayon niini apan sa gihapon ilang gitambagan ang mga sakop sa pamilya niini sa pagpaubos sa autopsy.

Si Engineer Oscar Tabada sa Philippine Atmospheric Geophysical and  Astronomical Services Administration (PAGASA) Mactan, dakbayan sa Lapu-Lapu nagkanayon nga ang bulan sa Mayo maoy labing init nga bulan sa matag tuig. Si Assistant Health Secretary Eric Tayag sa iyang pamahayag miingon nga ang pagsul-ob og light colored nga mga sapot maoy labing maayo sa init nga panahon ug ang pag-inom og daghang bugnaw nga tubig aron dali nga panington.

Sa laing bahin, tungod sa grabeng kainit ang Bureau of Fisheries and Aquatic Resources ug ang Department of Environment and Natural Resources mihimo usab og mga information dessimination alang sa mga mananagat ug mag-uuma.

Sigon pa ni Eduardo Inting, Regional Technical Director sa DENR-7, ang mga tanom imbes diha sa hawan, butangan kini og tabon ug may giumol sab silang forest protection brigade aron moresponde kun dunay forest fire. Samtang ang BFAR-7 miingon nga maapektahan  ang mga magbaw nga fishponds ug kinahanglang palawman lang kini ug ang mga nag-seaweed farming gitambagan nga adto kini itanom sa mas lawom nga bahin sa dagat. (/EIM)(BANAT NEWS)