Nag-wild sa disco gidakop, nakuhaan og Indian pana
CEBU, Philippines - Lalaki nga nag-wild sa gipahigayon’g disco didto sa Sitio Binabag, Barangay Tayud, Consolacion kagahapon sa kaadlawon nasakmitan usab og Indian pana mao nga pasakaan siya og kaso nga kriminal.
Si German Amoroto, 26, ulitawo nga taga Barangay Tayud, sakop na sa Liloan apan kanait ra sa Tayud, Consolacion.
Matud ni PO1 Albert Jimenez nga nalingaw unta sa pagsayaw ang mitambong sa maong disco nga gipahigayon isip kabahin sa pagpangandam sa umaabot nga pangilin sa ilang patron sa kapilya apan gitugaw sa kagubot nga gimugna ni Amoroto.
Samtang nalingaw pag-disco ang katawhan, ang suspetsado nga kuyog sa iyang mga barkada kalit lang nag-wild bisan kun wala’y igong hinungdan.
Matud ni PO1 Jimenez nga ang iyang mga kauban dali nga miresponde ug dali nila nga gisikop ang naghimo sa kagubot. Dihang girikisa si Amoroto, nasakmitan siya og Indian pana.
Kini maoy rason nga karong adlawa pasakaan si Amoroto og kaso nga paglapas sa Batas Pambansa Bilang-6 samtang gitanggong siya sa prisohan. (BANAT NEWS)
- Latest
