Call center agents maoy sagad manuyop sa Apas – Kap. Ayuman

CEBU, Philippines -  Giawhag ni Apas Barangay Kapitan Ramil Ayuman ang pangulo sa City Office for Substance Abuse Prevention (COSAP) Dr. Alice Utlang nga makig-alayon sa kadagkuan sa Cebu I.T. Park aron moumol sila og kaugalingong anti-drug abuse counsellors.

Tumong ni Ayuman nga masumpo ang problema sa illegal drugs sa iyang barangay nunot sa gihimong pagpangronda sa mga sakop sa City Intelligence Branch (CIB) sa Cebu City Police Office niadtong adlaw'ng Domingo.

Matud ni Ayuman nga dugay na nilang gireklamo ang paghitak sa ginadiling drugas sa iyang dapit nga sagad sa mga tiggamitan sa mga pushers mga call center agents. Si Ayuman mibutyag nga base sa impormasyong iyang nadawat naglibot sa I.T. Park ang mga namaligya og drugas. Ang mga call center companies 24-oras nga dunay trabaho gamit ang managlahing shiftings sa mga call center agents. Niadtong Domingo sa kaadlawon, nasikop sa CIB ang 12 ka mga lalaki sa usa ka buy-bust operation kauban ang City Anti-Illegal Drugs Special Operations Task Group (CAIDSOTG) diha sa sitio CRCI sa maong barangay. Target sa buy-bust si Regil Paragile apan nakaikyas kini, duna hinuoy nakuhang mga pinaketeng mga illegal nga drugas, mga armas ug drug paraphernalia ang kapolisan sa iyang balay. Sa gihimong pagronda sa CIB gikalipay sa kapitan nga nahatagan og aksyon ang dugay na nilang gireklamo ug nanghinaot nga hinay-hinay nang malimpyohan iyang barangay gikan sa ilegal nga drugas. (Decemay P. Padlilla/EIM)

Live-in partners sikop sa buy-bust

Nasikop sa Regional Anti-Illegal Drugs Special Operations Task Group ang manag live-in partner sa dakbayan sa Carcar sa buy-bust operation pasado alas 8:00 kagahapon sa buntag sa sitio Lumboy, barangay Liburon sa dakbayan sa Carcar.

Si Sr. Insp. Henrix Bancoleta, team leader, miingon nga ang nasikop mao sila si Sarah Solon ug si Ramil Geonzob, molupyo sa maong lugar.

Nasikop ang duha human nga si Solon mibaligya ngadto sa mga polis og usa ka pakete nga shabu nga balor og P500.

Narekober gikan sa gipuy-an sa mga suspetsado ang lima ka bulto nga shabu nga mobalor og P20 mil matag usa ug walo ka gagmay nga pakete nga shabu nga mobalor og P200 ang matag usa.

Matud pa ni Bancoleta nga si Solon ang tigbaligya sa dinagko nga order samtang si Geonzob ang tigbaligya sa ginagmay nga order.

Dugang ni Bancoleta nga gipaubos nila sa surveillance ang live-in partners sulod sa duha ka semana.

Matud pa ni Solon nga namaligya siya og shabu tungod sa kapobrehon ug aron siya nga makabayad sa iyang utang.

Si Bancoleta mingon nga gikan sa “Munti Boys” ang supply nga drugas ni Solon.  (BANAT NEWS)